Shkroi: Etrit Rexhepi
Po pretendohet se ka dështuar koncerti për nder të mërgimtarëve në Sheshin “Skënderbeu” në Prishtinë.
Kjo gjë është pretenduar me anë të një video-materiali, ku shihen disa karriga të zbrazura para një skene të ngritur në sheshin e përmendur, e publikuar dje (1 gusht) nga faqja e portalit “INTERLAJMI” në Facebook.
Çka ka gjetur hibrid.info?
Hibrid.info ka gjetur se koncerti për mërgimtarët është mbajtur në fillim të kësaj jave, ndërsa në datën e publikimit të këtij pretendimi nuk është paraparë mbajtja e ndonjë koncerti.
Vegëza e video-materialit të publikuar nga faqja e portalit “INTERLAJMI” në Facebook:
https://www.facebook.com/reel/797284049224696
Pas hulumtimit, hibrid.info ka gjetur se një koncert me rastin e 25 vjetorit të çlirimit të Kosovës, si shenjë falenderimi ndaj mërgatës është organizuar dhe mbajtur në datën 30 korrik (shih këtu).
Hibrid.info ka siguruar edhe pamjet nga ky koncert, për të vërtetuar se i njëjti nuk ka dështuar (shih këtu).
Po ashtu, duke kontrolluar pamjet nga video-materiali i trajtuar, vërehet se skena e shfaqur është ngritur për festivalin “Ramë Lahaj International Opera Festival”, me moton “T’knoft zemra”.
Hibrid.info me anë të makinave të kërkimit, ka vërtetuar se në në bazë të kalendarit të ngjarjeve që përfshinte ky festival, nuk parashihet mbatja e ndonjë koncerti në datën 1 gusht (shih këtu).
Festivali kishte nisur më 21 korrik dhe kulmon me koncertin përfundimtar që do të mbahet sot më 2 gusht.
Analiza:
Pretendimi se ka dështuar koncerti për nder të mërgatës është i pa saktë.
Hibrid.info ka gjetur se video-materiali me anë të së cilit është paraqitur pretendimi, nuk shfaq pamje të atij koncerti.
Bazuar në metodologjinë e punës, hibrid.info e vlerëson këtë përmbajtje si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.