Shkroi: Etrit Rexhepi
Publikohet një imazh që ka mbishkrimin “Kosova pritet t’i përfitojë rreth 880 milionë euro nga Këshilli i Evropës”.
Kjo përmbajtje është publikuar më 30 shtator nga faqja e portalit në gjuhën shqipe, “Indeksonline.net”, në Facebook.
Çka nuk shkon me përmbajtjen?
Hibrid.info ka gjetur se shuma që pritet të përfitojë Kosova, vjen nga Komisioni Evropian (KE), e jo nga Këshilli i Evropës (KiE).
Kjo përmbajtje me të njëjtin pretendim, është gjetur e publikuar edhe në disa faqe në Facebook, me emrat: “Korrekt Press”, “Gazeta Plisi”, “Fakte Press”, “Kastriotët e Dardanisë – Shqipërisë Veriore”, “Busulla e Jetes” dhe “Gazeta Papirus” (shih këtu, këtu, këtu, këtu, këtu dhe këtu).
Hibrid.info ka gjetur kronikën nga televizioni publik i vendit, “RTK” ku njoftohet Kosova pritet t’i përfitojë rreth 880 milionë euro nga KE në Bruksel (shih këtu).
Gjithashtu, në artikullin e publikuar në portalin “Indeksonline.net”, ndryshe nga publikimi në Facebook i kësaj faqe, raportohet saktë se Komisioni Evropian pritet të ndajë shumën e treguar për Kosovën (shih këtu).
Çka janë KE dhe KiE?
Komisioni Europian është krahu ekzekutiv i pavarur politik i BE-së. Ai është përgjegjësi i vetëm për hartimin e propozimeve për legjislacionin e ri evropian dhe zbaton vendimet e Parlamentit Evropian dhe Këshillit të BE-së (shih këtu).
Këshilli i Evropës është institucioni i BE-së që përcakton drejtimin e përgjithshëm politik dhe prioritetet e Bashkimit Evropian (shih këtu).
Tutje, hibrid.info ka gjetur raportime që vërtetojnë se në maj të këtij viti, çështja e anëtarësimit të Kosovës në Këshillin e Evropës (KE) u la jashtë rendit të ditës në takimin e Këshillit të Ministrave, çka tregon se vendi ynë, ende nuk është anëtar i këtij institucioni (shih këtu dhe këtu).
Analiza:
Pretendimi se Kosova pritet t’i përfitojë rreth 880 milionë euro nga Këshilli i Evropës, është i pasaktë.
Institucioni që pritet të ndajë këtë shumë, në fakt, është Komisioni Evropian.
Bazuar në metodologjinë e punës, hibrid.info e vlerëson këtë përmbajtje si “Gabim”.
Arsyetimi:
Vlerësimin “Gabim” e marrin përmbajtjet informative në të cilat, gjatë procesit të përpilimit apo publikimit, paraqiten gabime duke publikuar informacion të pasaktë (sidomos kur kemi të bëjmë me informacione në shifra) ose duke transmetuar lajme të pavërtetuara mirë, pa qëllimin e qartë të dezinformimit të publikut.