Vazhdon të publikohet artikulli me pretendimin e rremë për protesta kundër Qeverisë Kurti

Portali i dyshimtë me përmbajtje në gjuhën shqipe “banglarreporter.com” ka publikuar një artikull me titull të sajuar, me pretendim të rremë se po organizohet protestë kundër Qeverisë Kurti.

Pas verifikimit të fakteve nga hibrid.info është vërtetuar se titulli i këtij artikulli është i rremë dhe nuk përputhet me përmbajtjen.

Në përmbajtje gjendet një lajm i vjetër i publikuar në muajin qershor, kur Organizata e Veteranëve të Luftës (OVL) së UÇK-së kishte bërë thirrje për protestë pas arrestimit dhe lirimit të veteranit Faik Fazliu.

Vegëza e artikullit të publikuar në “banglarreporter.com”:

Ky artikull me titull të rremë është shpërndarë edhe në Facebook, nga faqja “Gazeta Aktive” e cila me këtë postim ka arritur të grumbullojë numër të madh komentesh e reagimesh (shih këtu).

Edhe në muajin nëntor të këtij viti është publikuar i njëjti artikull, por atëherë nga portalet tjera të dyshimta si ““gazetamitrovica.com” dhe “lajmefree.com”, e që gjithashtu janë verifikuar nga stafi i hibrid.info.

Vegëza e artikullit të verifikuar nga hibrid.info me datë 5 nëntor 2021:

Nga hulumtimi i kryer nga hibrid.info përmes makinave të kërkimit, është gjetur artikulli autentik i publikuar në kohë reale (7 qershor 2021) nga “gazetaexpress.com” (shih këtu).

Analiza:

Portali i dyshimtë “banglarreporter.com” ka publikuar një artikull të vjetër të cilin ëshë munduar ta paraqesë si aktual duke i vendosur titull të sajuar.

Ky artikull është publikuar edhe në muajin nëntor të këtij viti nga portale tjera të dyshimta, e që edhe atëherë është verifikuar nga stafi i hibrid.info.

Bazuar në metodologjinë e punës, hibrid.info e vlerëson këtë artikull si “dezinformatë”.

Arsyetimi:

Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.