Artikulli me titull “Shteti do të heqë të gjitha kufizimet anti-covid në fund të muajit” është publikuar nga portali “Kosova-sot.info”, ndërsa në fotografinë ilustruse ka vendosur një imazh në të cilën shihet një pjesë e sheshit të Prishtinës.
Me vendosjen e kësaj fotografie, ky medium online ka lënë të kuptohet se lajmi për heqjen e të gjitha kufizimeve anti-Covid ndërlidhet me Kosovës, pasi edhe në titull nuk bëhet e qartë se për cilin shtet bëhet fjalë.
Me të hyrë në tekst, atëherë qartësohet se ngjarja ka të bëjë me Britaninë e Madhe, ku kryeministri i saj Boris Johnson ka marrë vendim për heqjen e të gjithave masave kundër koronavirusit në fund të muajit.
Duke ditur se portali “Kosova-sot.info”, është i regjistruar në Kosovë dhe shumicën dërmuese të lexuesve i ka shqipfolës, artikulli me titull përgjithësues e jo sqarues, mund t’i dezinformojë lexuesit, duke lënë të kuptohet se shfuqizimi i masave kufizuese anti-Covid ka të bëjë me Kosovën.
Vegëza e artikullit të publikuar në “Kosova-sot.info”:
Hibrid.info ka arritur të gjejë këtë fotografi të publikuar më parë si ilustrim për ngjarje që ndërlidhen me Kosovën.
Mediat online si “Kosovapress.com” e “Insajderi.com” e kanë përdorur këtë fotografi në artikujt e tyre lidhur me rastet aktive me masat anti-Covid-19 në Kosovë. (shih këtu dhe këtu)
Analiza:
Portali “Kosova-sot.info” ka publikuar artikullin që ka të bëjë me Britaninë e Madhe, kryeministri i së cilës ka marrë vendim për heqjen e të gjithave masave kundër koronavirusit në fund të muajit shkurt.
Por, në publikimin e këtij artikulli është vendosur fotografi tjetër, ajo e një pjese të sheshit të Prishtinës dhe kjo mund t’i dezinformojë lexuesit, duke lënë të kuptohet se ky vendim ka të bëjë me shtetin e Kosovës.
Nga analiza e kontrollit të fakteve e kryer nga hibrid.info, ky artikull merr vlerësimin si “clickbait”.
Arsyetimi:
Vlerësimin “Clickbait” e marrin ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.