Një tjetër artikull me këshilla shëndetësore, i pabazuar në burime, është publikuar nga mediat online shqip të Kosovës.
Artikulli me titull “Koha në të cilën zgjohemi natën zbulon cila pjesë e trupit është ‘më e dobët’”, i publikuar fillimisht nga Telegrafi.com, tregon se si zgjimi nga gjumi i natës jep sinjale për shëndetin e njeriut.
Mirëpo, nuk ka asnjë burim apo referencë të ndonjë studimi që arsyeton të gjitha këto “gjetje” të pretenduara.
Pjesë të artikullit origjinal nga telegrafi.com:
Nëse natën zgjoheni në kohë të njëjtë ose megjithatë nuk mund të flini, zbuloni shkakun e vërtetë dhe mësoni se çfarë porosie ju dërgon trupi juaj.
Nëse zgjoheni midis orës 23 dhe orës një pas mesnate:
Zgjimi në këtë kohë do të thotë që hani ushqim tepër të rëndë dhe tepër të yndyrshëm dhe se është koha që të ndryshoni shprehitë e ushqimit, transmeton Telegrafi.Gjithashtu, zgjimi në këtë kohë mund të thotë edhe që në vete i mbani emocionet negative si p.sh. hidhërimi, zemërimi dhe gjykimi i vetvetes dhe/ose i të tjerëve.
Nëse zgjoheni midis orës 1 dhe orës 3 pas mesnate
Trupi ju tërheq vërejtjen që të ndryshoni ushqimin dhe të zvogëloni pirjen e alkoolit.Gjithashtu, zgjimi në këtë kohë është i lidhur me emocionet negative si p.sh. hidhërimi, zemërimi dhe fajësia për ç’shkak vështirë mund të relaksoheni.
Vegza e artikullit të plotë:
Ky artikull i cili, me gjasë mund të jetë i përkthyer nga një medium tjetër, siç ndodh shpesh, është publikuar bruto dhe shpërndarë edhe nga media tjera online të Kosovës.
Vegza e publikimit i të njëjtit artikulli nga rtklive.com:
https://www.rtklive.com/sq/news-single.php?ID=463111
Përkundër hulumtimit, hibrid.info e ka të vështirë të gjejë me saktësi burimin e këtij informacioni meqenëse teksti i përkthyer ka mund të jetë ndryshuar dhe për faktin tjetër që mediat dhe ueb-faqet në anglisht publikojnë shumë studime rreth kësaj teme, që mund të jenë të ngjashme.
Analiza:
Një artikull i tillë mund të përmbajë gjetje të rëndësishme dhe të cilat mund të jenë edhe të vërteta, mirëpo, përderisa autori nuk përmend burimet e informacione dhe citon referencat, ai është i pa argumentueshëm. Si rrjedhojë, ky shkrim mund të kategorizohet si “Përmbajtje e pa verifikuar”.
Arsyetimi:
Përmbajtje e pa verifikuar
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
