“‘Shqipëria bëhet, Kosova bëhet!’/ Diaspora u dynd dje në Tiranë, fjalimi i Albin Kurtit të Kuvend: Problem kryesor largimi i rinisë! Duhet të kthejmë besimin në institucione e shtet” mban titullin një artikull i publikuar nga portali në gjuhën shqipe “balkanweb.com”, më 21 qershor.
Në imazh shfaqet kryeministri në detyrë i Kosovës, Albin Kurti, ndërsa në prapavijë shfaqet një fotografi e protestës në Tiranë.
Pretendimi i njëjtë u publikua edhe në disa portale të tjera e në faqet e tyre në Facebook (shih këtu, këtu dhe këtu). Imazhet e publikuara me këtë pretendim kanë marrë mijëra pëlqime e qindra komente. Ndër komentues shihet se përmbajtja janë marrë si të mirëqena.
E vërteta?
Përderisa titulli lë hapësirë të interpretohet se Kurti ka komentuar protestat kundër projektit në Zvërnec, në artikull është publikuar një deklaratë e tij e dhënë para katër vjetësh në Kuvendin e Shqipërisë.
Vetë përmbajtja e artikullit tregon se fjalimi është i mëhershëm.
Nga verifikimi i fakteve ka rezultuar se Kurti fjalimin e ka dhënë në Kuvendin e Shqipërisë më 27 nëntor 2022, në prag të Ditës së Flamurit (shih këtu).
Një kërkim në Google me fjalët “Kurti flet për protestat në Shqipëri” nuk ka rezultuar në ndonjë artikull kredibil informacioni.
Konteksti:
Në Shqipëri qe më shumë se tri javë me anë të protestave po kundërshtohet një projekt i madh turistik në zonën e mbrojtur Pishë Poro-Nartë, pranë Vlorës. Aty parashikohet ndërtimi i hoteleve dhe vilave luksoze me vlerë miliarda euro dhe si projekt është i lidhur me investitorë të huaj, përfshirë plane të mëhershme të përmendura të Jared Kushner, dhëndrit të presidentit amerikan Donald Trump.
Banorët, aktivistët dhe shoqëria civile po protestojnë kryesisht për shkak të ndikimit të mundshëm në mjedisin e ndjeshëm të zonës, kontesteve të pronësisë së tokës, si dhe mungesës së transparencës rreth projektit dhe mënyrës së miratimit të tij (shih këtu).
Në disa raste Hibrid.info ka trajtuar përmbajtje që lidhin emrin e Kurtit me protestat në Tiranë (shih këtu).
Analiza:
Titujt e artikujve që lënë të kuptohet se kryeministri në detyrë i Kosovës, Albin Kurti, i ka komentuar protestat e fundit në Tiranë, janë të pasaktë
Vetë përmbajtja e artikullit e bën të qartë se deklaratat nuk kanë lidhje me zhvillimet aktuale në Shqipëri. Verifikimi tregon se fjalimi ishte mbajtur më 27 nëntor 2022 në Kuvendin e Shqipërisë, në prag të Ditës së Flamurit.
Po ashtu, nuk është gjetur asnjë burim kredibil që dëshmon se Kurti ka folur për protestat e fundit.
Bazuar në metodologjinë e punës, hibrid.info i vlerëson titujt si “dezinformatë”.
Arsyetimi
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.