Një llogari në TikTok që mban emrin “armies_of_the_world1”, ka publikuar një video-material ku shfaqet imazhi i Recep Tayyip Erdogan, presidentit të Turqisë.
Imazhit të presidentit turk i është vendosur mbishkrimi, që pretendon se ky i fundit ka dhënë vlerësime të larta për Policinë e Kosovës dhe ka deklaruar se Turqia do ta furnizojë me pajisje këtë institucion.
Por pas hulumtimit nga hibrid.info, nuk është gjetur asnjë material mbështetës që verteton pretendimin e publikuar nga llogaria në fjalë.
Vegëza e video-materialit të publikuar në TikTok nga llogaria “armies_of_the_world1”:
https://www.tiktok.com/@armies_of_the_world1/video/7309404333957745925
Deri në momentin e trajtimit, ky video-material ka marrë afër 27 mijë shikime. (shih fotografinë më poshtë)
Hibrid.info ka hulumtuar me anë të makinës së kërkimit, Google, për të vërtetuar deklaratën e mundshme të presidentit Erdogan, për Policinë e Kosovës, por rezultatet e kërkimit nuk kanë shfaqur përmbajtje që vërtetojnë pretendimin (shih këtu).
Po ashtu hibrid.info ka hulumtuar edhe në rrjetet sociale të presidentit turk, në të cilat nga njoftimet e fundit, nuk janë hasur deklarata të mundshme vlerësuese për Policinë e Kosovës (shih këtu, këtu dhe këtu).
Analiza:
Një llogari në TikTok ka publikuar një video-material, në të cilin pretendohet se Recep Tayyip Erdogan, presidenti i Turqisë ka shprehur komente vlerësuese për Policinë e Kosovës.
Por, pas verifikimit nga hibrid.info, është vërteuar se pretendimi nuk është mbështetur nga asnjë burim apo fakt.
Bazuar në metodologjinë e punës, hibrid.info e vlerëson këtë përmbajtje si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.