Disa faqe në Facebook kanë publikuar sot (24 shtator) një fotografi në të cilën shihet një trup i pajetë i një ushtari, që mban mbishkrimin “Foto ekskluzive: Edhe një terrorist serb i vrarë në veri, gjenden dy trupat e tyre”.
Pas verifikimit të fakteve të kryer nga hibrid.info, është vërtetuar se imazhi nuk paraqet trupin e pajetë të ndonjërit nga sulmuesit që sot (24 shtator) në veri të vendit sulmuan zyrtarë të Policisë së Kosovës (PK), që si pasojë e saj mbeti i vdekur një pjesëtar i PK-së dhe dy të tjerë u lënduan.
Fotografia në fjalë është gjetur e publikuar në mars të vitit 2022 dhe i përket një ushtari rus, gjatë agresionit të Rusisë në Ukrainë.
Vegëza e postimit në Facebook nga faqet “Gazeta Aktuale” dhe “Shprehu 02”:
Pas hulumtimit të kryer përmes programit të automatizuar “InVID”, hibrid.info ka arritur të gjejë këtë fotografi, e cila është publikuar nga disa media të huaja në mars të vitit 2022. (shih këtu dhe këtu)
Në fotografinë e publikuar në artikullin e “CNN” me datë 23 mars 2022, shihet qartë se ajo mban mbishkrimin “Kufoma e një ushtari rus i shtrirë në një rrugë në Sytniaky, Ukrainë, më 5 mars”. (shih fotografinë më poshtë)
Analiza:
Disa faqe në Facebook kanë publikuar një fotografi të një ushtari rus të vrarë në Ukrainë gjatë muajit shkurt 2022, me anë të së cilës kanë pretenduar se ajo i përket një “terroristi serb të vrarë në veri”.
Bazuar në metodologjinë e punës, hibrid.info e vlerëson këtë postim si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
