Faqja “Kredi Për Biznes” në Facebook vazhdon të publikojë postime me pretendime të rreme duke i paraqitur ato si oferta për kredi-marrje.
Me datë 14 korrik, kjo faqe ka postuar një ofertë për kredi-marrje deri në 5 mijë euro, duke pretenduar se në rast që klientët këto mjete i përdorin për të blerë pajisje elektro-shtëpiake, motoçikleta, makina apo tokë, atëherë do t’u ulet norma e interesit në 2%.
Pas hulumtimit të kryer nga hibrid.info, është vërejtur se në seksionin e informacioneve rreth veprimtarisë (about), kjo faqe nuk ofron asnjë informatë. (shih këtu)
Vegëza e postimit të publikuar në Facebook nga faqja “Kredi Për Biznes”:
Në këtë postim, kjo faqe ka ofruar një numër kontaktues me prefiksin (+31), përmes së cilit ftohen klientët që të kontaktojnë për marrjen e kredisë.
Hibrid.info pas verifikimit të fakteve, ka vërtetuar se prefiksi +31 i takon shtetit të Holandës. (shih këtu)
Për të kontaktuar në këtë numër telefoni, të interesuarit duhet që ta përdorin aplikacionin për komunikim “WhatsApp”.
Hibrid.info ka kërkuar në këtë aplikacion numrin që është dhënë nga faqja “Kredi Për Biznes”, në të cilën shfaqet fotografia e një burri me emrin “Eric Dupont”. (shih fotografinë më poshtë)
Pas kontrollit të fakteve përmes “InVID”, hibrid.info ka vërtetuar se fotografia që shfaqet në “WhatsApp” me këtë numër kontaktues, paraqet ministrin e Drejtësisë në Francë, Eric Dupond-Moretti. (shih këtu)
Kjo nuk është hera e parë që faqja e lartcekur poston fushata të institucioneve financiare në Kosovë, madje duke ua larguar logot autentike me pretendimin t’i paraqesë si të saj. (shih këtu)
Analiza:
Pas verifikimit të fakteve të kryer nga hibrid.info, është vërtetuar se faqja “Kredi Për Biznes” pretendon rrejshëm se ofron kredi deri në 5 mijë euro, duke ofruar numër kontaktues me prefiks të Holandës.
Ky numër në aplikacionin për komunikim “WhatsApp” shfaqet me emrin dhe fotografinë e ministrit të Drejtësisë në Francë, Eris Dupont-Moretti.
Bazuar në metodologjinë e punës, hibrid.info i ka vlerësuar këto faqe si “Mashtrim”.