Platforma për kontroll të fakteve (fact-checking) hibrid.info, pjesë e OJQ-së, Action for Democratic Society (ADS), pritet të rrisë aktivitetin edhe në drejtim të automatizimit të verifikimit të fakteve, përmes krijimit të aplikacioneve të bazuara në Teknologji Informative dhe Komunikimit (TIK).
Synimi për këtë vizion tashmë do të jetë i përbashkët me Fakultetin e Inxhinierisë Elektrike dhe Kompjuterike (FIEK) në Universitetin e Prishtinës, Hasan Prishtina.
Zotimi për këtë bashkëpunimi u bë të martën (31 maj), në ceremoninë e nënshkrimit të Marrëveshjes për Bashkëpunim në mes të drejtorit të ADS-së, Shkelzen Osmanit dhe Dekanit të FIEK-ut, profesor Isak Shabanit.
Në takim u diskutua për mënyrat e bashkëpunimit dypalësh që do të shërbenin në avancimin e përfshirjes së formave dhe metodave moderne të TIK-ut në aspektin e informimit në përgjithësi.
Gjatë takimit Osmani u shpreh se nevoja për bashkëpunime të tilla mes organizatave të Shoqërisë Civile dhe nivelit akademik nga Universiteti i Prishtinës, janë shumë të dobishme dhe të domosdoshme.
Duke iu referuar bashkëpunimit konkret, Osmani tha se kontributi akademik është shumë domethënës në fushën e medias, sidomos në këtë epokë digjitale duke qenë se, siç u shprehë ai, informacioni po prodhohet dhe shpërndahet kryesisht përmes hapësirës online.
“Tashmë, në epokën digjitale, audienca shumicën e informatave i merr përmes platformave digjitale. Si rezultat i kësaj, sfidë kryesore në vend por edhe në botë, po vazhdon të paraqitet kredibiliteti i burimeve të informacioneve dhe monitorimi i tyre, qoftë në mënyrë manuale apo edhe automatike. Duke qenë se Kosova tashmë renditet e para në rajon për sa i përket përqindjes së lartë të përdoruesve të internetit, cilësia e informacionit të cilin e konsumojnë kosovarët, po paraqitet të jetë një shqetësim shoqëror”.
Dekani i FIEK, profesor Isak Shabani, duke mirëpritur këtë bashkëpunim, shprehi vullnetin dhe gatishmërinë për angazhim të përbashkët në shërbim të informimin të drejtë të publikut për rolin dhe rëndësinë e verifikimit të fakteve dhe luftën kundër dezinformimit në Kosovë.
Shabani tha se, nga momenti i nënshkrimit të këtij Memorandumi të Bashkëpunimit, në mënyrë aktive do të shikohen mundësitë e përfshirjes së kontributit akademik në fillimin e iniciativave që do ndikonin në avancimin teknologjik të kontrollit dhe verifikimit të fakteve të përmbajtjes në hapësirën digjitale.
I pari i FIEK-ut gjithashtu tha se është i interesuar që të shtojë aktivitetet jashtë-kurrikular për studentët, siç janë trajnimet dhe ligjëratat të cilat, sipas tij, mund të shërbejnë në ngritjen e aftësive të tyre.
“Ne jemi të interesuar që angazhohemi për të nisur iniciativa të reja që janë në shërbim të studentëve, në plotësimin e njohurive të tyre, në këtë rast në fushën e informimit”.
Ndër aktivitetet që parashihen të arrihen përmes këtij Memorandumi janë:
- Studentët dhe stafi akademik i FIEK-ut, do të mund të përfshihen në projekte të hibrid.info, pa pasur nevojë të përcillen proceset formale;
- Shkëmbimi i informatave dhe materialeve edukuese, për nevoja të iniciativave nga të dyja palët;
- Shkëmbim profesional në mes të stafit të hibrid.info dhe stafit akademik të FIEK-ut;
- Bashkëpunime për fushata edukuese e vetëdijësuese;
- Bashkëpunime për trajnime dhe punëtori;
- Organizime të përbashkëta të seminareve, punëtorive e konferencave me interes të përbashkët;
- Organizime të përbashkëta të edukimit të vazhdueshëm afatshkurtër për tema me interes të përbashkët dhe pjesëmarrje të dy palëve në aktivitete;
- Të përgatisin së bashku Projekt-Propozime dhe të angazhohen në programe kërkimore, trajnime apo projekte tjera të sponsorizuara nga agjencitë financuese (donatorët) dhe pjesëmarrje të dy palëve në aktivitete;
- Bashkëpunim në ndërtimin e softuerëve të automatizuar për nevoja të informimit dhe për fusha tjera;
Ky Memorandum Bashkëpunimi është i dyti që hibrid.info e arrin me nivelin akademik, pas atij me Departamentin e Gazetarisë në Fakultetin e Filologjisë.
