Disa faqe në Facebook që publikojnë artikuj dhe postime me përmbajtje në gjuhën shqipe, me datë 13 dhe 14 qershor kanë postuar një fotografi të kryeministrit të Kosovës, Albin Kurtit, me mbishkrimin “Albin Kurti: Kosova jeton edhe pa Edi Ramën, ai u tregua pro serb ndaj Kosovës. Nuk e kisha imagjinuar”.
Pas hulumtimit të kryer përmes makinave online të kërkimit dhe mediave sociale, hibrid.info nuk ka gjetur një deklaratë të tillë të bërë nga shefi i qeverisë së Kosovës, ndaj kryeministrit të Shqipërisë, Edi Ramës.
Vegëzat e postimeve të publikuara në Facebook nga faqet “Gazeta Rilindja”, “Marimanga”, “Gazeta Ditore”, “Gazeta ABC” dhe “Rilindja”:
Në asnjë medium online nuk është arritur të gjendet e publikuar një deklaratë e tillë nga Kurti.
Gjithashtu, e njëjta nuk figuron as në llogaritë zyrtare të shefit të qeverisë së Kosovës në mediat sociale si, Facebook e Twitter. (shih këtu dhe këtu)
I vetmi reagim i Kurtit ndaj Ramës gjatë ditëve të fundit është lidhur me draft statutin e propozuar nga kryeministri i Shqipërisë, për të cilin i pari i qeverisë së Kosovës është shprehur se në vend se të dalë me propozim për Asociacionin e komunave me shumicë serbe në Kosovë, Rama duhet të ketë draft për shqiptarët në Luginë të Preshevës. (shih këtu)
“Nuk kam dyshim që kryeministri i Shqipërisë, Edi Rama beson që propozimi i tij për Draftstatutin është i mirë, dhe duke qenë kështu atëherë unë çka propozojë është që kryeministri Rama këtë draft për pakicat kombëtare t’ja propozojë presidentit të Serbisë, Aleksandër Vuçiq më së largu në takimin e radhës të “Ballkanit të Hapur” për shqiptarët në Preshevë, Medvegjë dhe Bujanoc”, ka theksuar Kurti, shkruan “KosovaPress.com”.
Analiza:
Pas verifikimit të fakteve të kryer nga hibrid.info, është vërtetuar se faqet e lartcekura në Facebook kanë publikuar një deklaratë të rreme me pretendimin se Kurti është shprehur se Edi Rama u tregua pro-serb ndaj Kosovës.
Bazuar në metodologjinë e punës, hibrid.info e vlerëson këtë publikim nga faqet në Facebook si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.