Artikulli me titull “Albin Kurti: I vetmi shtet besnik ndaj Kosovës është Turqia” është publikuar nga portali i dyshimtë me përmbajtje në gjuhën shqipe “banglarreporter.com”.
Pas verifikimit të fakteve të kryer nga hibrid.info, është vërtetuar se ky artikull përmban titull të rremë që nuk përputhet me përmbajtjen.
Lajmi është i vjetër, i cili është publikuar më 23 prill të vitit 2020, atëkohë kur Albin Kurti ishte kryeministër në detyrë.
Ai kishte përkujtuar një ditë të rëndësishme për popullin turk, atë të shkëputjes së Turqisë nga perandoria osmane, por në asnjë rast nuk ka thënë se Turqia është i vetmi shtet besnik ndaj Kosovës, siç pretendohet rrejshëm në titull.
Vegëza e artikullit të publikuar në “banglarreporter.com”:
I njëjti artikull është shpërndarë edhe në Facebook nga faqja “Gazeta Aktive” e cila numëron mbi 90 mijë ndjekës, e që në këtë postim ka arritur të grumbullojë numër të madh reagimesh e komentesh (shih këtu).
Pas hulumtimit përmes makinave të kërkimit, hibrid.info ka arritur të gjejë artikullin e publikuar në kohë reale (23 prill 2020) në disa media online në Kosovë (shih këtu, këtu).
Analiza:
Portali i dyshimtë me përmbajtje në gjuhën shqipe “banglarreporter.com” ka publikuar një artikull të vjetër të cilin është munduar ta paraqesë si aktual duke i vënë, siç duket qëllimshëm titull të rremë.
Pas analizës së kontrollit të fakteve bazuar në metodologjinë e punës, hibrid.info e ka vlerësuar këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
