Portali satirik “kungulli.com” ka publikuar një artikull të kësaj kategorie me titull “Afganët e parë në Kosovë: Paska parajsë edhe në tokë”.
Pas vendimit të Kosovës për të hapur dyert për refugjatët afganë, ky portal satirik (shiko këtu) ka postuar këtë artikull se gjoja qytetarët e Afganistanit kanë mbërritur në Kosovë.
Portali i dyshimtë newstoday74.com e ka publikuar këtë artikull që tingëllon si ngjarje e vërtetë. Gjithashtu, ky tekst i cili është i gjithi i sajuar në mënyrë satirike, është shpërndarë edhe në Facebook nga faqet si “Në Kohë” dhe “Specialja.com”, ku kanë grumbulluar komente dhe reagime, duke bërë lexuesit të mendojnë se refugjatët afganë kanë mbërritur në Kosovë.
Pjesë nga teksti i artikullit të publikuar në portalin satirik “kungulli.com”:
Pasi edhe Kosova ka hapur dyert për afganët me kerkesë të Shteteve të Bashkuara të Amerikës, disa prej tyre tashmë kanë arritur në vendin tonë.
Me të mbërritur në Sllatinë, ata janë shprehur të mahnitur me zhvillimin e shtetit më të ri në Ballkan.
“Nuk kemi fjalë. Një vend i vogël, por një parajsë e vërtetë. Është e mahnitshme që paska parajsë edhe në tokë”, ka deklaruar afgani Al Prind on Sad Riu, pasi mori rrugën drejt qytetit të Fushë Kosovës.
Raportohet se disa afganë të tjerë janë dërguar në Ferizaj, ku për orë të tëra kanë mbetur duke realizuar fotografi pranë nënkalimit.
Vegëza e artikullit të publikuar nga portali satirik “kungulli.com”:
Më poshtë mund të gjeni vegzën e artikullit të publikuar në portalin e dyshimtë “newstoday74.com”.
Ky artikull është shpërndarë edhe në Facebook nga faqet “Në Kohë” dhe “Specialja”, të cilat kanë një numër të madh ndjekësish, dhe një postim i tillë mund të dezinformojë lexuesit duke i bërë ata të besojnë se tashmë refugjatët afganë kanë mbërritur në Kosovë.
Vegëzat e postimeve në Facebook:
https://www.facebook.com/revistaspecialja/posts/356192119478542
https://www.facebook.com/nekohe/posts/195771329250768
Analiza:
Portali që prodhon lajme me përmbajtje satirike “kungull.com”, i cili e dëshmon edhe në kuadër të faqes online, ka publikuar një artikull të sajuar, që pretendon se refugjatët afganë kanë mbërritur në Kosovë. Këtë tekst e ka publikuar edhe portali i dyshimtë “newstoday74.com”, që ndonëse është portal i dyshimtë, i njëjti nuk ka sqaruar se ky artikull ka përmbajtje satirike, duke bërë të kuptohet si lajm i mirëqenë.
Gjithashtu, i njëjti artikull satirik është shpërndarë edhe nga disa faqe në Facebook, ku kanë mbledhur një numër të komenteve dhe reagimeve të ndryshme.
Pas analizës së kontrollit të fakteve të kryer nga hibrid.info, ky artikull vlerësohet si “satirë”.
Arsyetimi:
Vlerësimi i “Satirës” përfshinë përmbajtjen e cila përdor lajme të paramenduar që përdorin satirën për të treguar realitetin. Ky është edhe një mënyrë e raportimit i cili nuk është problematik, nëse media arrin të argumentojë se bëhet fjalë për një përmbajtje satirike.
Qëllimi i përfshirjes së këtij vlerësimi në metodologji është të tregohet ky lloj i përmbajtjes në situata kur mund të pretendohet se është një raport i vërtetë i mediave dhe kur bëhet potencialisht i dëmshëm në rast të transmetimit të mëtejshëm pa arritur që të shpjegohet qartë se bëhet fjalë për tekst satirik. Pra në raste të tilla, nëse një tekst nuk arrin të sqaroj se ka përmbajtje satirike, mund te kuptohet si i vërtetë dhe, si rrjedhojë, mund të krijojë opinion të gabuar tek audienca. Mirëpo, media që boton këtë lloj përmbajtjeje nuk mund të jetë në njërën nga listat negative vetëm për shkak të publikimit të këtij lloji të përmbajtjes.
