Përgatiti: Festim Rizanaj
Në rrjetet sociale, veçanërisht në Facebook, shpesh qarkullojnë postime dhe mesazhe të cilat premtojnë shpërblime të mëdha, si makina apo produkte falas, me qëllim për të mashtruar përdoruesit. Një nga rastet e fundit është një mesazh i dërguar nga faqja “Mega Mall”, ku pretendohej se fituesi kishte marrë një makinë “Volkswagen Tiguan 2025” dhe duhej të regjistrohej përmes një linku brenda 24 orëve.
Pas verifikimit nga Hibrid.info, u konstatua se kjo përmbajtje është mashtruese.
Karakteristikat kryesore që e bëjnë këtë rast tipik për mashtrimet online janë:
- Premtime të rreme dhe të parealizueshme
Mashtruesit shpesh premtojnë fitimin e një veture të re, dhurimin e qindra televizorëve ose produkte me çmime simbolike (p.sh. frigorifer për 2 euro), vetëm përmes një komenti ose regjistrimi.
Këto shpërblime nuk kanë asnjë bazë reale dhe përdoren si karrem për të tërhequr vëmendjen.
- Përdorimi i faqeve të rreme
Faqja “Mega Mall” në Facebook ishte hapur së fundmi (5 gusht 2025) dhe nuk kishte adresë apo kontakt zyrtar.
Ngjashëm, faqe të tjera si “Autowelt”, “ЕТС – Kosovo” apo “Viva Fresh Store.fans” janë krijuar me emra që imitojnë kompanitë e njohura për të fituar besueshmëri.
- Përdorimi i domain-eve falas ose të dyshimta
Linku i mesazhit për fitimin e veturës dërgonte te një adresë e dyshimtë: mega-mall877.myfreesites.net, një shërbim falas pa asnjë lidhje me kompaninë.
Platforma si “ScamAdviser” dhe “Scamdoc” e kanë vlerësuar faqen si me nivel të ulët besueshmërie dhe të mundshme për mashtrim.
- Kërkesa për të dhëna personale dhe financiare
Mashtruesit zakonisht kërkojnë emër, adresë, numër telefoni dhe madje edhe numrin e kartës së kreditit, me arsyetimin e rremë se “është vetëm për verifikim”.
Ky është treguesi më i qartë se qëllimi i tyre është vjedhja e të dhënave.
- Përdorimi i imazheve dhe logove të huaja
Për të krijuar besueshmëri, shpesh përdoren fotografi reale të qendrave tregtare apo kompanive të njohura, si rasti i qendrës tregtare “Mega Mall” në Bukuresht, e përdorur për të mashtruar përdoruesit shqiptarë.
- Shpërndarja masive dhe komentet e fabrikuara
Postimet marrin mijëra komente dhe shpërndarje, ku vetë faqja i përgjigjet secilit koment me thirrjen që përdoruesit të kontrollojnë mesazhet private.
Kjo krijon iluzionin e një gare reale, duke i shtyrë përdoruesit të bien pre e mashtrimit.
Analiza
Rastet e “Mega Mall”, “Autowelt”, “ЕТС – Kosovo” dhe “Viva Fresh Store.fans” tregojnë se:
- Premtimet për shpërblime të mëdha online janë një mashtrim klasik.
- Faqet e rreme nuk kanë kontakte të verifikuara, përdorin domain-e të dyshimta dhe kërkojnë të dhëna personale/financiare.
- Mashtruesit përdorin emrat e kompanive dhe shpërndarje masive për të krijuar besueshmëri të rreme.
Çfarë duhet të bëjmë si qytetarë?
- Kontrolloni gjithmonë nëse faqja është zyrtare (ka kontakt, adresë dhe shumë ndjekë
- Mos klikoni në linke të dyshimta që vijnë përmes mesazheve.
- Mos jepni kurrë të dhëna personale apo financiare në faqe të panjohura.
- Krahasoni gjithmonë me faqen zyrtare të kompanisë që pretendohet në postim.
- Raportoni faqet mashtruese tek Facebook ose tek institucionet përkatëse.
