Portali i dyshimtë “Specialja.com” ka publikuar një artikull me titull “Kosova mbyllet në këtë orë, dalin masat e reja kufizuese”.
Artikulli i publikuar nga ky portal i dyshimtë përmban titull të sajuar që nuk përputhet me përmbajtjen. Në përmbajtjen e këtij shkrimi gjendet postimi i Kryeministrit të Kosovës, Avdullah Hoti, i cili përmes rrjetit social Facebook njoftoi të dielën se masat e marra anti-covid kanë ndikuar në uljen e 15 për qind të numrit të rasteve pozitive. Ndërsa sa i përket vaksinës anti-covid, ai tha se si pjesë e koalicionit COVAX, Kosova pret të marrë vaksina për 20% të popullsisë.
“Specialja.com” ka përdorur postimin e Kryeministrit të Kosovës, të cilit i ka vënë titull të rremë, në mënyrë që të tërheqë sa shumë lexues.
Vegëza e artikullit të publikuar nga “Specialja.com”:
Pretendimi në titullin e këtij artikulli të “Specialja.com”, siç mund të vërehet nuk përputhet fare me atë që paraqitet në përmbajtje, pra me njoftimin e kryeministrit Hoti.
“Do të monitorojmë situatën dhe mbikëqyrim zbatimin e masave. Do të punojmë ngushtë me komunat dhe me të gjitha grupet për të kërkuar bashkëpunim dhe respektim të masave. Me këtë rast dëshiroj të falënderoj qytetarët për respektimin e masave dhe i lus të respektojnë këshillat e mjekëve. Institucionet shëndetësore do të mbesim të mobilizuara. Po përgatisim skenarët për masat e nevojshme për festat e fundvitit kur ka frekuentim më të madh të qytetarëve, përfshirë edhe ardhjen e bashkatdhetarëve”, shkroi ndër të tjerash Hoti në Facebook.
Postimi i Hotit në profilin e tij zyrtar në Facebook:
https://www.facebook.com/avdullah.hoti/posts/3908368079224517
Analiza:
Në postimin e Hotit në Facebook nuk përmendet se janë marrë masa të reja si pasojë e pandemisë COVID-19, ashtu siç thuhet në titullin e artikullit të “Specialja.com”. Pas verifikimit të fakteve nga hibrid.info, ky shkrim kategorizohet si “dezinformatë” dhe “clickbait”.
Arsyetimi:
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
