Presidenti i Serbisë, Aleksandar Vuçiq, ka pretenduar pa fakte se autoritetet në Kosovë po planifikojnë që të realizojnë një sulm më 1 tetor në veri të vendit.
Këtë pretendim presidenti serb e ka bërë gjatë një konference për media, pas takimit me përfaqësuesin special të BE-së për dialogun Kosovë-Serbi, Miroslav Lajcak, të mbajtur dje pasdite (29 qershor) në Beograd.
Këto komente Vuçiq i ka bërë si reagim ndaj vendimit të Qeverisë së Kosovës për masa të reciprocitetit ndaj Serbisë.
Deklarata e Aleksandar Vuçiq e publikuar në mediumin serb “B92”:
Në kuadër të pretendimeve tjera të pabazuara si “planifikimi i një operacioni “Stuhia” të ri” dhe “qëllime të Qeverisë së Kosovës për të zbrazur Kosovën nga serbët”, Vuçiq e ka përmendur edhe planin për sulm në veri të Kosovës, që sipas tij do të ndodhë më 1 tetor.
Pjesë të deklaratës së Vuçiq-it që ndërlidhen me pretendimin për sulm:
“Kam biseduar me përfaqësuesit e Listës Serbe, ata nuk do të tolerojnë më. Ata nuk do të tolerojnë ndërhyrje nga njësitet e tyre. Ata kanë dhënë afat, dhe Prishtina po planifikon një sulm të përgjithshëm në veri të Kosovës më 1 tetor. Dhe njerëzit duhet ta dinë këtë”.
Pretendime të tilla nga Vuçiq të pabazuara në fakte, si parashikime për ngjarje në Kosovë, ka bërë edhe më herët. Disa të tilla i ka trajtuar hibrid.info, si pretendimi për sulm në stacioni i transformatorit të energjisë elektrike “Vallaç” në veri të Kosovës të bëra gjatë muajve tetor, nëntor dhe dhjetor të vitit të kaluar, duke i vlerësuar si teori konspirative (shih këtu, këtu dhe këtu).
Analiza:
Presidenti i Serbisë, Aleksandar Vuçiq, pretendimin e bërë gjatë konferencës për media, nuk e ka bazuar në asnjë fakt. Të gjitha pohimet tjera të bëra gjatë kësaj konference rezultojnë të jenë narrativë politike e pa mbështetur.
Për këtë arsye, bazuar në metodologjinë e hibrid.info, ky pretendim i Vuçiq-it vlerësohet si “Teori Konspirative”.
Arsyetimi:
Vlerësim si “Teori konspirative” marrin ato raportime mediatike të cilat shpërndajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre raportimeve është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.
