Shkroi: Etrit Rexhepi
Publikohet një video-material ku shihen disa persona duke sulmuar fizikisht një tjetër person, në një hapësirë publike në Brooklyn – New York.
Videoja me pretendim se personat që e kryejnë sulmin, janë të përkatësisë etnike shqiptare, është publikuar sot (13 nëntor) në platformën “X” (ish-Twitter), nga një llogari me emrin “VukFeNix”.
E vërteta e pretendimit
Hibrid.info ka vlerësuar se në këtë përmbajtje nuk vërehen prova dhe dëshmi që vërtetojnë se personat e shfaqur në video, janë shqiptarë.
Pas hulumtimit me anë programit të automatizuar të kërkimit, “InVID”, hibrid.info e ka gjetur të publikuar nga disa llogari në rrjetet sociale me pretendime të ndryshme.
Videoja është gjetur e publikuar në dy raste (datat 9 dhe 12 nëntor), me pretendimin se i sulmuari, i përket komunitet hebre dhe sulmohet nga mbështetës të Hamasit dhe anti-semitë (shih këtu dhe këtu).
Por, publikimet më të hershme të gjetura të kësaj videoje, janë të datës 8 nëntor, në përshkrimet e të cilave shprehet shqetësimi për atë që ka ndodhur në Brooklyn – New York, pa saktësuar identitetin etnik të protagonistëve të pamjeve të shfaqura (shih këtu dhe këtu).
Në bazë të gjitha përshkrimeve, kuptohet se ngjarja ka ndodhur në Brooklyn – New York, por në bazë të asaj që shihet, është vështirë të përcaktohet identiteti kombëtar i personave që shfaqen në video.
Analiza:
Pretendimi se personat që shihen në një video duke e sulmuar një tjetër person në Brooklyn – New York, i takojnë komunitetit shqiptar, është i pabazë.
Hibrid.info ka gjetur se nuk ka fakte që vërtetojnë pretendimin e trajtuar.
Bazuar në metodologjinë e punës, hibrid.info e vlerëson këtë përmbajtje si “Manipulim i fakteve” e “Dezinformatë”.
Arsyetimi:
Vlerësimin si “Manipulim i fakteve” marrin ato përmbajtje informative që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.
