Portali informative online në gjuhën shqipe “Gazetatema.net” ka publikuar dje (12 prill) një artikull duke pretenduar se kanë siguruar fotografi të Arbër Zaimit, të cilit i referohen si këshilltar politik i Albin Kurtit.
Në fotografitë e publikuara, shihen imazhe të një ambienti me makina të lojërave të fatit. Përveç tjerash, në këto fotografi shihet edhe një person, për të cilin, “Gazetatema.net” pretendon se është Abër Zaimi. Në këto fotografi të publikuara në artikullin me titull “Turizëm elektoral dhe kazino. Ja ku e kaloi wikendin këshilltari kryesor politik i Albin Kurtit”, vërehet se nuk ka një qartësi që dëshmon se, personi në i paraqitur në imazh, është Arbër Zaimi.
Artikulli i publikuar në “Gazetatema.net”:
Këshilltari kryesor politik i Albin Kurtit, Arbër Zaimi, i cili këtë fundjavë si shumica e partisë zbarkuan në Shqipëri për fushatë elektorale, duket se ka zgjedhur ta kaloj më qetë natën pas orës policore në Tiranë. Duke qenë si këshilltar i kandidatit të “Vetvendosjes” në Tiranë, ai duket se ka kaluar një ditë të lodhshme dhe në mbrëmje është parë në mjediset e Regency Casino në qendër të Tiranës. Shoku i tij Bojken Abazi ka bërë publik numurin e llogarisë për ndihma financiare, por me sa duket mentori kryesor i fushatës së tij nuk ka shumë probleme për para, shkruan gazeta TemA.
Vegëza e artikullit të publikuar në “Gazetatema.net”:
Përveç fotografive të publikuara, në artikull nuk ka ndonjë sqarim shtesë, që argumenton pretendimin se në imazhin e paraqitur gjendet i apostrofuari, Arbër Zaimi.
I njëjti artikull është shpërndarë edhe nga disa portale informative në gjuhën shqipe nga Kosova:
Vegëzat e artikullit të shpërndarë nga disa media kosovare:
Mirëpo, ky pretendim i bërë nga portali “Gazetatema.net”, është mohuar nga vetë Arbër Zaimi. Ai në një prononcim për “insajderi.org” ka thënë:
“Jo nuk ka asgjë të vërtetë. Nuk kam ardhur këtu (Tiranë) në ndonjë fundjavë, jam këtu prej 6 javësh, dhe në asnjë mbrëmje, e as ditën nuk kam qenë në asnjë vend të lojërave të fatit”.
Vegëza e reagimit të Arbër Zaimit në “insajderi.org”:
Analiza:
Duke u bazuar në kontrollin e fakteve të bërë nga hibrid.info, rezulton se fotografitë e publikuara nga “Gazetatema.net”, nuk janë një argument i mjaftueshëm që plotëson pretendimin e bërë. Siç mund të vërehet, këto fotografi janë të paqarta, që vështirësojnë identifikimin e personit që është pjesë e imazhit. Gjithashtu, në artikull nuk jepen të dhëna shtesë, që e argumentojnë pretendimin se Arbër Zaimi është personi që gjendet në imazh e paraqitur në fotografi. Për këtë arsye, hibrid.info e vlerëson këtë artikull si “Përmbajtje të pa verifikuar”.
Vlerëzimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
