Shkroi: Fatbardh Dema
Nëpërmjet një postimi në TikTok, është pretenduar se senatorë amerikanë dhe Departamenti Amerikan i Shtetit kanë deklaruar se nuk kanë kohë të merren me kryeministrin e Kosovës, Albin Kurti dhe se qytetarët e Kosovës duhet të zgjedhin mes Lindjes apo Perëndimit.
Pretendimi u publikua më 16 janar nga llogaria me emrin “kosovatoday.info_1”. Në postim është fotografia e objektit të Departamentit Amerikan të Shtetit dhe titulli i vendosur mbi foto.
Çka nuk shkon me pretendimin?
Pas verifikimit të fakteve, del se pretendimi nuk është i bazuar në fakte. Hibrid.info ka përdorur motorin online të kërkimit “Google” për të kërkuar për pretendimin. Rezultatet nuk kanë gjetur ndonjë artikull apo burim kredibil informacioni për pretendimin.
E njëjta vlen edhe po që se kërkohet për qëndrime të fundit të senatorëve amerikanë për Kosovën.
Hibrid.info ka kërkuar për qëndrimet e fundit të shprehura publikisht nga institucionet amerikane. Ambasada e SHBA-së në Kosovë, më 15 janar reagoi për mbylljen e strukturave paralele serbe në Kosovë duke thënë se ka qenë veprim i pakoordinuar i Qeverisë së Kosovës dhe e “minon aspiratat e Kosovës për t’iu bashkuar komunitetit euroatlantik”.
Më 10 janar, në Kosovë për vizitë qëndroi zëvendëssekretari amerikan i Shtetit për Menaxhim dhe Burime, Richard Verma, që u takua me liderët e Kosovës. Në një intervistë për Kohavisionin, Verma i ka cilësuar si “shumë të mira takimet me presidenten dhe kryeministrin”.
Ndërsa më 17 janar, kjo ambasadë uroi Kosovën që u bë shteti i 29-të që miratoi Praktikat më të mira për parimet e Washingtonit mbi artin e konfiskuar nga nazistët.
Analiza:
Pretendimi se senatorët amerikanë dhe Departamenti Amerikan i Shtetit kanë deklaruar se nuk kanë kohë të merren me kryeministrin e Kosovës dhe se qytetarët duhet të zgjedhin mes Lindjes apo Perëndimit, nuk është i bazuar në fakte.
Hibrid.info duke përdorur motorin online të kërkimit “Google” nuk ka gjetur asnjë fakt që e mbështet këtë pretendim.
Bazuar në metodologjinë e punës, hibrid.info e vlerëson përmbajtjen si “Lajm të rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.