Artikulli me titull “Ulet çmimi i naftës, rënie kaq të madhe nuk ka pasur dy vitet e fundit”, është publikuar dje (29 qershor) nga portali i dyshimtë me përmbajtje në gjuhën shqipe “bera.todaynews44.com”.
Pas kontrollit të fakteve, hibrid.info ka vërtetuar se titulli i artikullit është jo adekuat, i cili nuk përputhet me përmbajtjen.
Në përmbajtje të artikullit gjendet një lajm i vjetër i datës 5 qershor, i publikuar nga agjencia kombëtare e lajmeve në Shqipëri, “NOA.al”, e cila ka cituar agjencinë britanike të lajmeve “Reuters”.
Në këtë artikull të publikuar nga “NOA.al” bëhet e qartë se Shtetet e Bashkuara të Amerikës (SHBA) kanë vendosur të ndihmojnë direkt Evropën për të ulur çmimin e naftës dhe benzinës, duke i hapur rrugën kompanive evropiane të marrin karburant nga Venezuela.
Vegëza e artikullit të publikuar në portalin e dyshimtë “bera.todaynews44.com”:
Ky artikull është shpërndarë edhe në rrjetin social Facebook nga faqja “33shi.com”, e cila ka mbi 40 mijë ndjekës. (shih këtu)
Pas hulumtimit përmes makinave online të kërkimit, hibrid.info ka arritur të gjejë artikullin e publikuar nga NOA.al. (shih këtu)
Për të qartësuar edhe më shumë faktin se në Kosovë nuk ka ulje të madhe të çmimit të naftës, siç pretendohet në titullin e këtij artikulli, hibrid.info ju sjellë vendimet e Ministrisë së Industrisë, Ndërmarrësisë dhe Tregtisë (MINT) për çmimet tavan për shitjen e derivateve për ditën e mërkurë (29 qershor) dhe sot, e enjte (30 qershor). (shih këtu dhe këtu)
Kjo nuk është hera e parë që ky artikull me titull të sajuar është publikuar nga portale të dyshimta, pasi i njëjti është publikuar edhe me datë 11 qershor nga një portal tjetër i dyshimtë, e që gjithashtu edhe atëherë është verifikuar nga hibrid.info. (shih këtu)
Analiza:
Portali i dyshimtë “bera.todaynews44.com” ka publikuar një artikull të datës 5 qershor që tregon se SHBA-të kanë vendosur të ndihmojnë direkt Evropën për të ulur çmimin e naftës dhe benzinës, duke i hapur rrugën kompanive evropiane të marrin karburant nga Venezuela.
Por, ky portal i dyshimtë, këtij artikulli i ka vënë titullin e sajuar “Ulet çmimi i naftës, rënie kaq shumë nuk ka pasur dy vitet e fundit”.
Bazuar në metodologjinë e punës, hibrid.info e ka vlerësuar këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
