Shkroi: Fatbardh Dema
Një ueb-faqe e quajtur “coldispam.com” ka vendosur në shitje një produkt me pretendimin se ndihmon në rikthimin e dëgjimit.
Kjo ueb-faqe në kreun e saj ka vendosur logon e portalit në gjuhën shqipe “BalkanWeb”.
Po ashtu, në përmbajtje të saj është vendosur edhe fotografia e një personi që njihet si mjek popullor, Erxhan Muharremi, i cili mban në duar një produkt me emrin “U CAPS”.
Çka gjeti hibrid.info?
Pas kontrollit të fakteve, hibrid.info ka vërtetuar se kjo ueb-faqe nuk është e sigurt. Duke përdorur platformën për verifikim të ueb-faqeve “Scamdoc.com”, rezultatet tregojnë se nuk dihet se kush qëndron prapa saj. (shih këtu)
Në këtë ueb-faqe shfaqet logo “Balkanweb”. Pas hulumtimit të kryer nga hibrid.info, u vërtetua se kjo logo i përket portalit në gjuhën shqipe “Balkanweb.com”, e cila duket se është keqpërdorur nga portali “coldispam.com”.
Kush është personi që shfaqet në përmbajtje?
Në këtë përmbajtje shfaqet emri dhe figura e një personi që njihet si mjek popullor, Erxhan Muharremi.
Në përmbajtjen e artikullit të publikuar nga portali “coldispam.com”, Muharremi shfaqet duke mbajtur në duar një produkt me emrin “U CAPS”. (shih fotografinë më poshtë)
Pas hulumtimit të kryer nga hibrid.info, është gjetur se kjo fotografi është e montuar. E njëjta është gjetur në një emision të RTV Dukagjinit, në të cilën Muharremi mbante në duar tjetër produkt. (shih fotografinë më poshtë)
Element tjetër që fakton se është ndërhyrë në imazhin e Muharremit, është fakti se i njëjti nuk kishte orë e as unazë në duar, siç paraqitet te përmbajtja e portalit “coldispam.com”.
Çka është produkti U CAPS?
Pas hulumtimit rreth këtij produkti të quajtur “U Caps”, hibrid.info ka gjetur artikullin e publikuar nga kontrollues faktesh nga Bosnja, “Raskrinkavanje.ba” që kanë trajtuar përmbajtjen e ngjashme, ku është vërtetuar se ky produkt është i rremë. (shih këtu)
Hibrid.info ka trajtuar edhe më parë përmbajtje lidhur me këtë produkt, i cili shitej nga ueb-faqe tjera të dyshimta. (shih këtu dhe këtu)
Analiza:
Pas verifikimit të fakteve të kryer nga hibrid.info, është vërtetuar se për të shitur këtë produkt që pretendohet rrejshëm se i njëjti ndihmon në rikthimin e dëgjimit, është përdorur një fotografi që paraqet një person me emrin Erxhan Muharremi, i cili njihet si mjek popullor.
Kjo përmbajtje është gjetur e publikuar nga një portal i dyshimtë.
Kontrollues faktesh nga Bosnja “Razkrinkavanje.ba”, me datë 25 prill në artikullin e publikuar në lidhje me produktin “U Caps”, kanë sqaruar se i njëjti është i rremë.
Bazuar në metodologjinë e punës, hibrid.info e ka vlerësuar këtë promovim të këtij produkti si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.