YouTube fshiu kanalet e transmetuesit rus RT në gjuhën gjermane, duke thënë se kishte shkelur politikën e saj të dezinformimit rreth virusit Korona, shkruan Reuters.
“YouTube ka pasur gjithmonë udhëzime të qarta për komunitetin, të cilat përshkruajnë atë që lejohet në platformë”, tha një zëdhënës i YouTube.
Fillimisht kanalit rus RT në gjuhën gjermane iu dha një masë ndëshkuese për publikimin e një videoje që binte ndesh me politikat e faqes rreth informimit për Covid-19, duke rezultuar në një pezullim të të drejtave të postimit në platformë për një javë.
Gjatë pezullimit, transmetuesi rus u përpoq të përdorte një kanal tjetër për të anashkaluar ndalimin e ngarkimit.
“Si rezultat, të dy kanalet u ndërprenë për thyerjen e Kushteve të Shërbimit të YouTube”, tha zëdhënësi.
Të gjitha videot e ngarkuara në YouTube duhet të jenë në përputhje me udhëzimet që përcaktojnë llojin e përmbajtjes që lejohet të jetë në platformë.
YouTube edhe më herët ka marrë masa të ngjashme edhe për disa kanale tjera, të cilat kanë publikuar dezinformata për Covid-19.
Në gusht të këtij viti, kanalit të televizionit Sky News në Australi iu pezullua e drejta për publikim për një javë për videot ku mohohej ekzistenca e koronavirusit.
Në mesin e medieve që kanë pësuar ndëshkime nga YouTube për arsye të ngjashme, janë edhe një radio britanike dhe një rrjet amerikan i lajmeve.
