Shkroi: Fatbardh Dema
Përmes një imazhi pretendohet se presidenti serb, Alleksandar Vuçiq ka shpërndarë në X (ish-Twitter) postimin e gazetarit Berat Buzhala.
Tutje në përshkrimin e këtij imazhi pretendohet se në këtë postim, Buzhala ka fajësuar kryeministrin e Kosovës, Albin Kurti, për shpërthimin që ndodhi më 29 nëntor në kanalin e ujit “Ibër-Lepenc” në Zubin Potok.
Kjo përmbajtje u publikua sot (3 dhjetor) në Facebook nga faqja “Lajme Nga Bota”.
E vërteta?
Pas kontrollit të fakteve të kryer nga hibrid.info, u vërtetua se pretendimi i bërë nga faqja e lartcekur, është i rremë.
Hibrid.info ka gjetur se postimi i Buzhalës është i vjetër (31 maj 2023) dhe nuk ka të bëjë me ngjarjen e 29 nëntorit në Zubin Potok.
Në cicërimën e Buzhalës shihet të ketë një përmbajtje (anglisht) rreth një opinionit të tij për sfidat që, siç i përshkruan ai, “i kanë gazetarët që nuk pajtohen me pushtetin për zhvillimet e fundit në veri”.
Pjesë nga cicërima e Berat Buzhalës në llogarinë e tij në Twitter më 31 maj, të përkthyera në shqip:
“Është vërtet një situatë sfiduese për ne gazetarët e Kosovës që nuk pajtohemi me qasjen e qeverisë Kurti, veçanërisht në lidhje me pjesën veriore të Kosovës. Ne besojmë fuqishëm se Kurti po merr disa vendime të gabuara, veçanërisht duke u kthyer kundër gjithë komunitetit ndërkombëtar që e mbështet Kosovën, duke përfshirë edhe aleatin tonë më të rëndësishëm, Shtetet e Bashkuara. Ne i kemi paralajmëruar njerëzit për pasojat e mundshme të këtyre veprimeve”.
Hibrid.info pas hulumtimit ka konstatuar se në llogarinë e presidentit serb në X, nuk shfaqet asnjë shpërndarje e postimit të gazetarit Buzhala. Postimi i fundit nga Vuçiqi në këtë platformë është ai i bërë sot që nuk ka asnjë lidhje me zhvillimet në Kosovë. (këtu)
Kjo nuk është hera e parë që një pretendim i tillë u publikua online. Hibrid.info e ka trajtuar edhe më parë pretendimin e ngjashëm se Vuçiqi ka shpërndarë postimin e Buzhalës. (shih këtu dhe këtu)
Vërtetësia e këtij materiali u kontestua edhe nga vetë personi i përfolur në të. Gazetari Berat Buzhala me datë 31 maj 2023, përmes një postimi në llogarinë e tij në Facebook e cilësoi këtë pretendim si “fake” (e rreme). (shih reagimin e Buzhalës (këtu)
Edhe reagimi i Asociacionit të Gazetarëve të Kosovës (AGK) në Facebook, vërteton se gazetari Berat Buzhala ishte bërë cak i foto-montazheve. (shih publikimin nga AGK (këtu).
Analiza:
Në një imazh të publikuar në media sociale, pretendohet se presidenti serb Alleksandar Vuçiq e ka shpërndarë në Twitter postimin e gazetarit Berat Buzhala, me pretendimin se ky i fundit kishte fajësuar kryeministrin e Kosovës, Albin Kurti, për shpërthimin që ndodhi më 29 nëntor në kanalin e ujit “Ibër-Lepenc” në Zubin Potok.
Pas verifikimit të fakteve të kryer nga hibrid.info, u vërtetua se ky pretendim është i rremë. Postimi i bërë nga Buzhala është i vjetër (31 maj 2023), përmes së cilit ai kishte shprehur opinionin e tij për sfidat që, siç i përshkruan, “i kanë gazetarët që nuk pajtohen me pushtetin për zhvillimet e fundit në veri”.
Gjithashtu, ky postimi nuk është gjetur i shpërndarë në llogarinë e presidentit serb në X.
Bazuar në metodologjinë e punës, hibrid.info këtë pretendim e vlerëson si “lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
