Shkroi: Fatbardh Dema
“Detaje të reja nga aksioni në Kaçanik/ Një ish-polic dhe një ish-ushtar ndër të arrestuarit”, mban titullin artikulli i publikuar sot, (21 prill) nga portali informativ “IndeksOnline.net”.
Ky medium online pretendon se sipas burimeve, ndër shtatë persona të arrestuar ndodhen edhe një ish-polic dhe një ish-ushtar i Forcës së Sigurisë së Kosovës (FSK).
I njëjti artikull është publikuar më pas edhe nga dy portale tjera si “Shekulli.info” dhe “GazetaPapirus.com”, të cilat kanë cituar portalin “IndeksOnline.net”.
Çka nuk shkon me këtë pretendim?
Drejtori i përgjithshëm i Policisë së Kosovës, Gazmend Hoxha, në një konferencë për media sqaroi se nuk ka policë të arrestuar në mesin e personave të dyshuar për vrasjen e zyrtarit policor, Muhamet Lika.
Hoxha gjatë konferencës për media sqaroi se në mesin e shtatë personave të arrestuar, është edhe një ish-pjesëtar i FSK-së (këtu).
Ndërsa pak minuta më vonë, ai rithekson se nuk bëhet fjalë për ish-polic të arrestuar, por për një ish-pjesëtar të FSK-së (shih këtu nga minuta 4:25)
Hoxha përmendi se është konfiskuar një armë zyrtare e një polici, i biri i të cilit është në mesin e të shtatë arrestuarve nga ky aksion (këtu).
“Është arrestuar një person i cili është biri i një polici tonë, në shtëpinë e të cilit kemi kryer bastisje. Me qëllim të verifikimit të çdo mundësie të mundshme është sekuestruar arma e tij zyrtare. Është armë zyrtare e Policisë së Kosovës, e një polici që punon në Policinë Kufitare. Andaj mbetet të verifikohet dhe sqarohet se mos është përdorur në këtë rast apo rastet e tjera”, u shpreh Hoxha.
Pak kontekst
Me datë 1 prill rreth orës 23:00 në Kaçanik, është vrarë me armë zjarri rreshteri i policisë, Muhamed Lika.
Sot (21 prill) Policia e Kosovës ka arrestuar shtatë persona si të dyshuar për këtë vepër.
Analiza:
Artikulli i publikuar nga “IndeksOnline.net” dhe i cituar nga dy portale tjera pretendon se në mesin e të arrestuarve për rastin në Kaçanik është edhe një ish-polic. Por ky pretendim është i pasaktë.
Drejtori i Policisë së Kosovës, Gazmend Hoxha, në një konferencë për media, sqaroi se nuk ka ish-polic të arrestuar, por vetëm një ish-pjesëtar i FSK-së. Ai gjithashtu sqaroi se është sekuestruar një armë zyrtare e një polici aktiv, për shkak se një nga të arrestuarit është biri i tij.
Bazuar në metodogjinë e punës, hibrid.info e vlerëson këtë pretendim si “Përmbajtje e paverifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.