Shkroi: Etrit Rexhepi
Është publikuar një artikull i titulluar, “Matjet e fundit: VV-ja bie 5%, PDK-ja rritet”.
Artikulli është publikuar sot (6 maj) nga mediumi, “Nacionale.com”.
Çka nuk shkon me këtë përmbajtje?
Informacioni ka ardhur si deklaratë e një moderatori, ndërsa në titull është paraqitursi fakt i konfirmuar.
E njëjta përmbajtje është publikuar edhe në faqen e këtij portali në Facebook (shih këtu).
Titulli i lajmit jep një informacion, “VV-ja bie 5%, PDK-ja rritet”, në bazë të një burimi, që në këtë rast është paraqitur si, “Matjet e fundit”.
Në titull gjithashtu, nuk jepet asnjë detaj për burimin, metodologjinë apo institucionin që i ka kryer ato matje.
Ndryshe nga titulli, kreu i lajmit shton se këto matje janë përmendur në një televizion kur thuhet se, “Në emisionin “Debat Plus”, në RTV Dukagjini, mbrëmë është diskutuar për matjet e fundi për partitë politike”.
Ndërsa në paragrafin pasues tregohet se informacioni ka ardhur nga një deklaratë, kur thuhet se, “Ndonëse nuk është bërë e ditur se cila kompani i ka bërë këto matje, autori i emisionit, Ermal Panduri, ka thënë se në bazë të këtyre matjeve, VV-ja bie 5 për qind, kurse PDK-ja rritet 3 për qind”.
Lajmi gjithashtu përmban edhe videon, që konfirmon deklaratën e ardhur nga Panduri (shih këtu).
Çka do të thotë se, ndryshe nga titulli, paragrafët e parë dhe videoja, tregojnë se, pohimi “Matjet e fundit: VV-ja bie 5%, PDK-ja rritet”, mbështetet në një deklaratë të bërë në emision nga moderatori Ermal Panduri dhe jo në një burim të qartë apo të verifikueshëm.
Pra, në këtë tekst vërehet një mospërputhje midis titullit, që paraqet informacionin si fakt të konfirmuar, dhe përmbajtjes, e cila tregon se burimi i matjeve nuk bëhet i ditur.
Analiza
Titulli i artikullit paraqet një informacion të pakonfirmuar si fakt të sigurt.
Hibrid.info ka gjetur në përmbajtje se lajmi mbështetet vetëm në një deklaratë të një moderatori televiziv, pa ofruar asnjë burim të verifikueshëm, metodologji apo institucion që qëndron pas matjeve të përmendura.
Bazuar në metodologjinë e punës, hibrid.info e vlerëson përmbajtjen si “Clickbait”.
Arsyetimi
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.