Artikulli me titull “Kandidati i LDK: Ne zgjedhjet e ardhshme LDK do të dalë e para Albini se kalon as pragun”, është publikuar nga portali i dyshimtë “mitrovicapress.com”.
Pas analizës së kontrollit të fakteve nga hibrid.info, del që ky artikull përmban titull të sajuar, i cili nuk përputhet me përmbajtjen e tekstit.
Kandidati i LDK-së për deputet, Faton Bislimi, më 14 shkurt kishte deklaruar në emisionin “Pressing” në televizionin T7 se nëse konfirmohet ky rezultat i exitpolleve, do të jetë një mësim i madh për partinë e tij, e cila do të reflektojë dhe do të bëhet parti fituese në sfidat e tjera zgjedhore. Pra, ai asnjëherë nuk ka thënë se kryetari dhe kandidati i Lëvizjes Vetëvendosje për kryeministër, Albin Kurti, nuk do ta kalojë pragun në zgjedhjet e ardhshme, siç pretendohet në titullin e artikullit të publikuar nga “mitrovicapress.com”.
Teksti i artikullit të publikuar në “mitrovicapress.com”:
Kandidati i LDK: Ne zgjedhjet e ardhshme LDK do të dalë e para Albini se kalon as pragun
Kandidati për deputet nga radhët e LDK’së Faton Bislimi /Pak sekonda pasi ta kaloni marketingun shfaqen pamjet
thotë se nëse vërteton KQZ’ja pozitën e tretë të LDK’së në këto zgjedhje ata duhet të refelektojnë.
“Rezultati final që ne presim nga KQZ shpresoj dhe uroj të jetë të paktën më mirë se ai që kemi parë në exitpolle”, theksoi Bislimi.
Është i bindur se në zgjedhejt e ardhshme LDK do të dalë e para.
‘Si LDK nëse konfirmohet ky rezultat i exitpolleve, do të jetë një mësim i madh prej të cilit LDK do të reflektojë dhe do të bëhet parti fituese në sfidat e tjera zgjedhore”, shtoi ai
Vegëza e artikullit të publikuar në “mitrovicapress.com”:
Më poshtë mund të gjeni vegëzat e artikullit autentik të publikuar në kohë reale në “Gazetaexpress.com” dhe nga disa media tjera të Kosovës:
Analiza:
Portali i dyshimtë “mitrovicapress.com” ka publikuar një lajm të datës 14 shkurt me deklaratën e kandidatit nga radhët e LDK-së, Faton Bilimi, të cilit i ka vënë titull të sajuar duke u munduar ta paraqesë atë si të vërtetë.
Ky artikull është shpërndarë në Facebook nga faqja “Gazeta Aktive”, e cila numëron afër 90 mijë pëlqime, e që kryesisht publikon lajme jo të sakta. Pas verifikimit nga hibrid.info, del që ky shkrim kategorizohet si “dezinformatë” dhe “clickbait”.
Arsyetimi:
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
