Media online “IndeksOnline.net”, ka publikuar një artikull me titull “Skandaloze: Bandat e korruptuara të FFK-së nuk akreditojnë gazetarët që kritikojnë punën e tyre”. Këtë epitet  kjo media ia dha FFK-së, por duke mos e bazuar atë me ndonjë argument nga përmbajtja e tekstit.

Në tekstin e këtij artikulli gjendet edhe postimi i gazetarit të sportit në RTK, Arlind Sadiku, i cili ka kritikuar FFK-në për mos akreditimin e tij për ndeshjen që Kosova pritet ta zhvillojë ndaj Anglisë në grupmoshat U-21. Por, Sadiku asnjëherë nuk e ka përmendur fjalën “Bandat e FFK-së”.

---

Teksti origjinal i publikuar në IndeksOnline.net:

Kosova A dhe Kosova U21 do të zhvillojnë ndeshjet ndërkombëtare gjatë muajit shtator.

Skuadra e drejtuar nga Challandes luan në Itali kundër Moldavisë derisa e pret në Prishtinë Greqinë në kuadër të Ligës së Kombeve.

Ndërsa skuadra e Rafet Prekazit luan ndeshjen kualifikuese për Europianin U21 kundër Anglisë të premten në Fadil Vokrri, shkruan Indeksonline.

Por në dy ndeshjet që luhen në shtëpi, FFK nuk ka akredituar shumë gazetar që ndër vite kanë dhënë kontribut të jashtëzakonshëm në promovimin e sportit.

Shumë gazetarëve i është kthyer kërkesa si negative dhe nuk mund ta kryejnë punën e tyre për të raportuar nga vendi i ngjarjes.

Njëri ndër ta është edhe gazetari i Supersportit, Arlind Sadiku i cili ka marrë përgjigje negativë në kërkesën e tij për akreditim për ndeshjen Kosovë – Angli.

Kjo më shumë duket si hakmarrje ndaj atyre që kanë ngritur zërin për parregullsitë që e kanë karakterizuar Federatën gjatë gjithë vitit.

Më poshtë është edhe reagimi i Sadikut:

Federata ma paska refuzu kerkesen per akreditim ne ndeshjen Kosove U21 – Angli U21. Mendojne qe ne kete forme munen me na mbylle gojen apo mu hakmarre, kush e di… Gabim jeni.

Duhet ta kuptoni qe Kombetarja e Kosoves, prej grupmoshave te reja e deri te A-ja, nuk eshte prone private e juaja. Merita e suksesit te tyre i takon ekskluzivisht futbollisteve, pastaj trajnereve e stafit. Eshte per cudi se si kreret e FFK-se mundohen ta cilesojne kete sukses si te tyre.

Me kujtohet Fadil Vokrri cfare pune galopante ka bere dhe fale punes se tij qe ndertoje themelet, jemi ketu ku jemi. Pavaresisht kesaj, ate asnjehere nuk e mbaje mend duke marre merita dhe duke u livdu.

Nese dojme me shku perpara duhet me pas casje dhe sjellje profesionale, me i pranu kritikat qe jane me vend dhe u mundu mu permiresu.

Suksese Kombetares tone.

---

Analizë:

Pas analizës nga hibrid.info, ky artikull përmban titull tendencioz, pasi epiteti që i është dhënë FFK-së nga kjo medie online, nuk përputhet me përmbajtjen brenda në tekst. Pra, faktet e paraqitura në tekst, nuk argumentojnë titullin, përmes së cilit pretendohet se brenda FFK-së ka “banda të korruptuara”. Ky lajm kategorizohet si “Dezinformatë” dhe “Clickbait”.

---

Arsyetimi:

Dezinformata – Ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.

Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.

Share With Others