Shkroi: Fatbardh Dema
Përmes disa fotografive, është ngritur pyetja se “Çka kërkon Albin Kurti në takim të fshehtë në Beograd me Peshkopin Teodosije?”.
Ky postim u publikua dje (17 shtator) në Facebook nga faqja “RTK ti kthehet popullit”.
Çka nuk shkon me këtë postim?
Pas kontrollit të fakteve, hibrid.info ka vërtetuar se kryeministri i Kosovës, Albin Kurti, nuk është takuar fare me peshkopin e dioqezës së Rashkës dhe Prizrenit, Teodosije.
Mirëpo, në njoftimin e Kryeministrisë bëhet e ditur se Kurti është takuar në Prishtinë me mitropolitin e Kishës Ortodokse të Malit të Zi, Boris Bojoviq, takim në të cilin ishte edhe ish-udhëheqësi i Lidhjes së Social Demokratëve të Vojvodinës, Nenad Çanak.
Vegëza e artikullit të publikuar në Facebook nga faqja “RTK ti kthehet popullit”. (shih këtu)
Pas hulumtimit të kryer nga hibrid.info, është vërtetuar se ky takim u zhvillua në Prishtinë më 16 shtator, dhe se në të nuk ishte fare i pranishëm peshkopi Teodosije.
Në njoftimin e Kryeministrisë, lidhur me këtë takim, u tha se “gjatë bisedës u diskutua mbi çështje aktuale, zhvillimet në rajon, pasojat e vazhdueshme të agresionit ushtarak rus në Ukrainë dhe rrezikun që lufta atje vazhdon të paraqes për sigurinë e kontinentit të Evropës dhe rajonin e Ballkanit”. (shih këtu)
Analiza:
Përmes disa fotografive, u pretendua se Kurti u takua fshehurazi në Beograd me peshkopin e dioqezës së Rashkës dhe Prizrenit, Teodosije.
Pas verifikimit të fakteve, hirbid.info ka vërtetuar se ky pretendim është i rremë. Në ueb-faqen zyrtare të kryeministrisë, u sqarua se ky takim u zhvillua në Prishtinë me ish-udhëheqësin e Lidhjes së Social Demokratëve të Vojvodinës, Nenad Çanak, i shoqëruar nga mitropoli i Kishës Ortodokse të Malit të Zi, Boris Bojoviq.
Bazuar në metodologjinë e punës, hibrid.info e vlerëson këtë pretendim si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.