Portali informativ “Gazeta-shqip.com” ka publikuar dje (3 tetor) një artikull me titull “E RËNDË/ Konsumuan karamele me kanabis, mbi 60 nxënës përfundojnë në spital”.
Titulli konsiderohet si përgjithësues, ngaqë pas verifikimit të fakteve të paraqitura në përmbajtje, “Hibrid.info” ka vërtetuar se titulli nuk e sqaron se në cilin shtet ka ndodhur ngjarja në fjalë.
Lajmi qartësohet në përmbajtje, më saktësisht në kreun e lajmit, kur thuhet se, “Më shumë se 60 nxënës të një shkolle fillore kanë përfunduar në spital në Xhamajka, pasi hëngrën karamele të mbushura me kanabis.”.
Fakti që portali informativ është i regjistruar në Shqipëri (shih këtu) dhe përmbajtja e ofruar nga ky portal është në gjuhën shqipe, titulli lë hapësirë për interpretim se ngjarja ka ndodhur në hapësirat shqip-folëse.
Vegëza e artikullit të publikuar në portalin “gazeta-shqip.com”:
Po ashtu Hibrid.info ka gjetur artikullin e publikuar edhe nga media të huaja, të cilat kanë njoftuar për ngjarjen e ndodhur në Xhamajka. (shih këtu dhe këtu)
Analiza:
Portali informativ “gazeta-shqip.com” ka publikuar një artikull në lidhje me një ngjarje të ndodhur në Xhamajka, por që në titull nuk sqarohet se për cilin shtet bëhet fjalë.
Prandaj edhe bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.