Disa media online në gjuhën shqipe kanë raportuar të mërkurën (8 prill) se Lideri i ri Suprem i Iranit, Mojtaba Khamenei, ka vdekur.
Mediat që raportuan për këtë ngjarje janë “Veriu.info”, “JavaNews.al” dhe “Periskopi.com”. Kjo e fundit pretendimin e ka bërë vetëm në faqen zyrtare në Facebook “Periskopi“.
Të njëjtat përdorën si burim një llogari në X, që pretenduan se i takon Ushtrisë Amerikane.
E vërteta?
Pas verifikimit të fakteve të kryer nga hibrid.info, u vërtetua se ky pretendim nuk është i saktë.
Në artikujt e publikuar nga “JavaNews.al” dhe “Veriu.info”, gjendet edhe vegëza e njoftimit nga një llogari në median sociale X e quajtur “America Millitary”.
Pas verifikimit, u vërtetua se kjo nuk është llogaria zyrtare e Ushtrisë Amerikane.
Te biografia e kësaj llogarie shkruan: “Azhurnime mbi konfliktet dhe luftërat globale, Lajmet e fundit, Analiza gjeopolitike, Faqe komentuese, Na ndiqni për azhurnime ditore”. Kjo llogari rezulton të jetë me bazë në Azinë Jugore. (shih këtu)
Pretendimi i kësaj llogarie, të cilës i janë referuar mediat në gjuhën shqipe, u bë më 4 prill.
Dyshimet se kjo llogari nuk është zyrtare nisin që në emrin e saj, pasi fjala “ushtri” në gjuhën angleze është “MiLitary”, e jo “MiLLitary”.
Pastaj, emri i Liderit Suprem iranian është i shkruar gabim, nga “Mojtaba” në “Mujtaba”. Gjithashtu, edhe mbiemri i tij është shkruar me shkronjë të vogël (khamenei). Një element tjetër është se fjala të cilës mediat në gjuhën shqipe i janë referuar si “ndërrim jete”, në postim është e shkruar “dea…”, e pasuar me “View more” (Shih më shumë), por që kjo frazë nuk është e klikueshme dhe nuk ofron informacion të mëtejmë. Për informacion, fjala “ndërrim jete” në anglisht shkruhet “dead”.
Llogaria zyrtare e ushtrisë amerikane në X është kjo “U.S. Army”.
Të dhënat e fundit mbi gjendjen shëndetësore të Mojtaba Khameneit: Mediumi britanik “The Times”, me datë 6 prill ka raportuar se Khamenei është pa ndjenja dhe po merr trajtim mjekësor në qytetin iranian, Qom.
Analiza:
Pretendimi nga disa media në gjuhën shqipe për vdekjen e Liderit Suprem iranian, Mojtaba Khamenei, duke iu referuar një llogarie gjoja zyrtare të Ushtrisë Amerikane, është i pakonfirmuar dhe nuk mbështetet nga burime zyrtare.
Informacioni që ka qarkulluar bazohet në një llogari në X që nuk është zyrtare e Ushtrisë Amerikane, siç pretendohet dhe përmban të dhëna të dyshimta, përfshirë gabime gjuhësore.
Verifikimi tregon se nuk ka njoftim zyrtar për vdekjen e Khameneit, ndërsa raportime të tjera flasin vetëm për një gjendje të rënduar shëndetësore dhe trajtim mjekësor të tij.
Andaj, bazuar në metodologjinë e punës, hibrid.info e vlerëson këtë përmbajtje si të “Paverifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.