Artikulli me titull “Te Lidhja e Prizrenit, Policia lidh dy gjilanas: Gjen granatë dore e drogë – përfshihet Ushtria”, është publikuar nga portali “periskopi.com”.
Pas verifikimit të fakteve të kryer nga hibrid.info, del që titulli i këtij artikulli është i shkruar gabim, pasi ngjarja nuk ka ndodhur te Lidhja e Prizrenit, por në qytetin e Gjilanit në rrugën “Lidhja e Prizrenit”.
Me të lexuar titullin, krijohet përshtypja që flitet për ngjarjen e ndodhur afër shtëpisë ku është mbajtur Lidhja e Prizrenit, pra në Prizren. Ndërsa në përmbajtje ka përshkrim korrekt për ngjarjen që në fakt ka ndodhur në Gjilan.
Pjesë nga teksti i artikullit të publikuar në “periskopi.com”:
Policia e Kosovës në raportin e saj 24 orësh ka njoftuar edhe për një rast që ka ndodhur në Gjilan, më saktë në rrugën Lidhja e Prizrenit.
Dy qytetarë janë arrestuar pasi në veturë u gjet fillimisht një armë me dy fishekë.
Pasi një të dyshuari të tretë iu kontrollua shtëpia, aty u gjet edhe drogë, një revole me gas, dy radiolidhje dhe më e rëndësishmja, një granatë dore.
Vegëza e artikullit të publikuar në “periskopi.com”:
Analiza:
Pas verifikimit nga hibrid.info, del se titulli i artikullit në periskopi.com është i shkruar gabim, por pa qëllimin e qartë të dezinformimit të publikut. Megjithatë, fakti që ky artikull flet për qytet tjetër, mund të dezinformojë lexuesit e këtij portali. Ky artikull kategorizohet si “Gabim”.
Arsyetimi:
Gabim – Vlerësimin “Gabim” e marrin raportet në media në të cilat redaksia e mediave bënë një gabim duke publikuar informacion të pasaktë ose duke transmetuar lajme të pavërtetuara nga një burim tjetër, pa qëllimin e qartë të dezinformimit të publikut.
