Shkroi: Etrit Rexhepi
Publikohet një imazh që pretendon se paraqet një sondazh, ku tregohet mbështetja elektorale ndaj subjekteve politike në Kosovë, para zgjedhje parlamentare të 9 shkurtit.
Kjo përmbajtje është publikuar dje (6 shkurt), në Facebook nga një faqe me emrin “Shadervani”, me pretendimin se paraqet trendin aktual para zgjedhjeve, (CET – Current Election Trend).
A është kredibil ky sondazh?
Hibrid.info ka gjetur se nuk ekzistojnë të dhëna që konfirmojnë se ky sondazh është kredibil.
Rezultatet e paraqitura në këtë sondazh të pretenduar janë: Lidhja Demokratike e Kosovës (LDK) –28%, Lëvizja Vetëvendosje (LVV) – 26%, Partia Demokratike e Kosovës (PDK) – 24%, Aleanca për Ardhmërinë e Kosovës (AAK) – Nisma Socialdemokrate 9%.
Hibrid.info ka hulumtuar përmes makinës së kërkimit, “Google”, duke kërkuar për artikuj që do të mund të paraqesin këtë sondazh apo të dhënat e pretenduara brenda tij. Por diçka e tillë nuk është hasur (shih këtu).
Gjithashtu, hibrid.info nërmjet kësaj makine, ka kërkuar për trendin aktual para zgjedhjeve, por asnjë nga rezultatet e këtij hulumtimi nuk konfirmojnë shifrat e paraqitura në përmbajtjen e paraqitur.
Rreth sondazheve
Një prej sondazheve është publikuar nga Valicon, një prej agjencive të hulumtimit në rajonin Adria. Në bashkëpunim me platformën e saj online Opinia.Club, Valicon ka realizuar sondazhin parazgjedhor për këtë proces zgjedhor.
Sondazhi tjetër (17 dhjetor) që u qarkulloi në media ishte nga kompania “UBO Consulting”, e cila sqaroi se sondazhi për partitë politike është bërë nga shërbimi OMNIBUS.
Hibrid.info ka verifikuar dhjetëra sondazhe të rreme e të vjetra që ishin të manipuluara me pretendimin të paraqiten si aktuale (shih artikullin këtu).
Analiza:
Pretendimi për publikimin e një sondazhi lidhur me subjektet politike për zgjedhjet parlamentare të 9 shkurtit 2025, është i rremë.
Hibrid.info ka gjetur se të dhënat e këtij sondazhi nuk janë gjetur të publikuara në burime kredibile.
Bazuar në metodologjinë e punës, hibrid.info e vlerëson këtë përmbajtje si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
