Artikulli me titull “Arben Gashi: Në fillim të Vitit 2023 populli do të levizë pa viza”, është publikuar nga portali i dyshimtë me përmbajtje në gjuhën shqipe “banglacontent24.com”.
Pas hulumtimit të bërë përmes makinave online të kërkimit, hibrid.info nuk ka arritur të gjejë një deklaratë të tillë të bërë nga deputeti i LDK-së, Arben Gashi.
Nga verifikimi i fakteve, rezulton se ky artikull përmban titull dhe përmbajtje të sajuar. Në tekst mund të vërehet jo-serioziteti i këtij portali, pasi diku pretendohet se bëhet fjalë për muajin janar, e diku tjetër për nëntor.
Vegëza e artikullit të publikuar në portalin e dyshimtë “banglacontent24.com”:
Ky artikull është shpërndarë edhe në Facebook nga faqja “Gazeta Aktive”, ku në publikimin e këtij artikulli, kjo faqe ka arritur të marrë mbi 20 komente. (shih këtu)
Kjo nuk është hera e parë që ky artikull publikohet nga portale të dyshimta. I njëjti është publikuar edhe me 7 dhjetor 2020, e që gjithashtu është verifikuar nga hibrid.info. (shih këtu)
Analiza:
Ky artikull i publikuar nga portali i dyshimtë “banglacontent24.com”, përmban titull dhe përmbajtje të rreme.
Pas verifikimit të fakteve nga hibrid.info, dhe analizës së tyre, konstatohet se ky shkrim përmban lëshime dhe indikator që tregojnë jo-profesionalizëm. Të gjitha këto, bëjnë që ky artikull të vlerësohet si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.