Nën organizimin e Fondacionit Metamorphosis, konferenca ndërkombëtare me temën “Transformimi digjital i qytetarëve” është duke zhvilluar në Shkup. Konferenca mblodhi përfaqësues të institucioneve, sektorit qytetar, medias, institucioneve akademike, aktivistë, praktikues dhe qytetarë, duke u ofruar atyre hapësirë për të eksploruar transformimin digjital përmes prizmit të e-qeverisjes inteligjente, ndarjes digjitale, privatësisë, inteligjencës artificiale, rezistencës kibernetike dhe luftës hibride.
Në panelin hyrës të konferencës, audiencës iu drejtua edhe themeluesi i programit për kontroll faktesh dhe për edukim digjital e medial “Hibrid.info”, Shkelzen Osmani, ku prezantoi sfidat dhe problemet me të cilat ballafaqohet shoqëria kosovare në aspektin keqinformimit. Osmani theksoi edhe burimet që shfaqin rrezik për keqinformimin dhe sulmet kibernetike.
“Problemi kryesor me te cilin ballafaqohet audienca kosovare është mungesa e njohurive qe u mundëson atyre që, në mënyrë kritike, të identifikojë përmbajtjet e rrezikshme, që mund të jenë keqinformuese”, tha Osmani.
Ndërsa, duke iu referuar sigurisë kibernetike, ai tha se autoritetet në vend kanë filluar të punojnë në drejtim të krijimit të strategjisë për siguri kibernetike, por e cila ende pret të miratohet në Kuvend.
Drejtuesi i organizatës Metomorphosis, Bardhyl Jashari, përpos prezantimit të detajeve të konferencës, foli edhe për sfidat me të cilat ballafaqohet Maqedonia e Veriut në fushën e sigurisë kibernetike dhe keqinformimit.
Klodiana Kapo nga organizata për kontroll faktesh “Faktoje.al”, nga Tirana, foli për sfidat me të cilat është ballafaquar Shqipëria në këtë drejtim.
Konferenca u organizua si pjesë e projektit “Rritja e Pjesëmarrjes së Qytetarëve në Agjendën Digjitale – ICEDA”, i bashkë-financuar nga Bashkimi Evropian dhe i zbatuar nga Fondacioni Metamorphosis (Maqedonia e Veriut), Akademia për e-Qeverisje (Estoni), Lëvizja Mjaft! (Shqipëri), Partnerët për Ndryshime Demokratike Serbi (Serbi), OJQ-ja 35 mm (Mali i Zi) dhe “Open Data Kosovo” (Kosovë).
