Në edicionin e 8-të të konferencës “Ditët e Laboratorëve të Medias”, të organizuar nga Global Alliance for Media Innovation, u prezantua projekti HibridLAB dhe pesë aplikacione inovative për rregullimin e infosferës digjitale.
Ngjarja u zhvillua në Vjena, duke mbledhur përfaqësues të laboratorëve mediatikë nga mbarë Evropa, akademikë dhe startup-e, me fokus në proceset e inovacionit, përdorimin e inteligjencës artificiale dhe sfidat e dezinformimit në epokën digjitale.
Aplikacionet u prezantuan nga themeluesi dhe drejtori i Hibrid.info, Shkëlzen Osmani, dhe synojnë të rrisin transparencën në media, si dhe të forcojnë mekanizmat për identifikimin dhe luftimin e dezinformimit.
Konferenca u vlerësua si një platformë e rëndësishme për shkëmbimin e ideve dhe zhvillimin e zgjidhjeve inovative për sfidat e informacionit në nivel evropian.