Llogaria në TikTok “alarm.news” ka publikuar një imazh që paraqet pamje nga një protestë, ku në një pankartë shihet portreti i ish-presidentit të Kosovës, Hashim Thaçi, dhe mbishkrimi “Kush është kundër gjykatës është kundër Kosovës”.
Në imazh, pranë protestuesve, shihet edhe deputetja e Partisë Demokratike të Kosovës (PDK), Ganimete Musliu.
Çka nuk shkon me këtë përmbajtje?
Pas verifikimit të fakteve nga hibrid.info, është vërtetuar se mbishkrimi në pankartën e paraqitur në këtë fotografi është i manipuluar.
Pas kërkimit të imazhit dhe analizimit të materialeve të publikuara online, hibrid.info ka gjetur se fotografia është marrë nga një protestë e mbajtur më 24 dhjetor 2022 në Kosovë, e organizuar nga Partia Socialdemokrate (PSD), kundër dënimit të Sali Mustafës nga Dhomat e Specializuara të Kosovës.
Pamjet nga kjo protestë janë publikuar edhe nga kanali i Top Channel në YouTube (shih këtu).
Nga verifikimi i pamjeve, hibrid.info ka gjetur se pankarta që mbanin protestuesit në fotografinë origjinale kishte mbishkrimin “Jo në emrin tim”.
Megjithëse nuk është gjetur fotografia e njëjtë në formën e saj origjinale, krahasimi i pamjeve nga protesta dhe fotografive të tjera të publikuara nga i njëjti aktivitet tregon se bëhet fjalë për të njëjtët persona dhe të njëjtën pankartë. Në materialet autentike, pankarta shihet me mbishkrimin “Jo në emrin tim”.
Screenshot nga video-materiali i publikuar në kanalin e Top Channel në YouTube.
Krahasimi i pamjeve nga protesta, ku shihen disa nga personat e njëjtë dhe pankarta origjinale.
Kësisoj, fotografia autentike është ndërhyrë në mënyrë digjitale, duke u zëvendësuar mbishkrimi origjinal në pankartë me tekstin “Kush është kundër gjykatës është kundër Kosovës”.
Pra, fotografia e publikuar nga llogaria “alarm.news” paraqet një protestë reale të vitit 2022, por mesazhi i pankartës është ndryshuar përmes manipulimit vizual.
Analiza
Fotografia që paraqet protestën, ku pretendohet se protestuesit mbanin pankartë me portretin e ish-presidentit Hashim Thaçi dhe mbishkrimin “Kush është kundër gjykatës është kundër Kosovës”, është e manipuluar.
Pamjet autentike tregojnë se në pankartën e protestuesve ishte shkruar “Jo në emrin tim”.
Bazuar në metodologjinë e punës, hibrid.info e vlerëson këtë përmbajtje si “Mashtrim”.
Arsyetimi
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.