Portali “Kosova-sot.info” ka publikuar një artikull me pretendimin se historiania, Elena Kocaqi, është kandidate për presidente të Shqipërisë.
Hibrid.info ka verifikuar faktet në këtë artikull, ku është vërtetuar se në përmbajtje nuk ofrohet ajo që pretendohet në titull.
Në përmbajtje gjendet një status i Elena Kocaqit, e cila në profilin e saj zyrtar në Facebook ka thënë: “Kam parë këto ditë në disa media sondazhet popullore për presidentin e ri. Jam shumë e nderuar që në shumicën e tyre kam kryesuar listën e vullnetit popullor, deri dhe në shifrat 70 e 90%”.
Por, Kocaqi në këtë status e ka mohuar se është kandidate për presidente të Shqipërisë, duke shtuar: “Nuk është se nuk dua unë tē bēj për vendin tim, por këtu çdo gjë e ka në dorē politika që i ka hequr popullit çdo lloj të drejte për zgjedhjen e presidentit, si dhe i ka kufizuar atij edhe te drejtën e zgjedhjes sē deputetëve me votë popullore”. (shih këtu)
Pra, nuk është e vërtetë që Kocaqi është kandidate për presidente të Shqipërisë, siç pretendohet në artikullin e publikuar nga “Kosova-sot.info”.
Vegëza e artikullit të publikuar në “Kosova-sot.info”:
Mënyra e kandidimin në Shqipëri bëhet përmes Kuvendit, ku një kandidat për President i propozohet Kuvendit nga një grup prej jo më pak se 20 deputetësh. (shih këtu) Pra, kandidati për President në Shqipëri nuk zgjedhet nga populli.
Megjithatë, Kocaqi mund të jetë kandidate për Presidente nëse propozohet nga një grup prej jo më pak se 20 deputetësh, por një gjë e tillë ende nuk është zyrtarizuar. Gjithashtu, kjo është mohuar edhe nga vetë historiania.
Analiza:
Portali “Kosova-sot.info” ka publikuar një artikull me pretendimin se Elena Kocaqi është kandidate për Presidente të Shqipërisë. Por, në përmbajtje të këtij artikulli nuk ofrohet ajo që pretendohet në titull.
Gjithashtu, Kocaqi ka mohuar se është kandidate për Presidente pasi që, siç është shprehur, zgjedhja nuk bëhet direkt nga vota e pupullit.
Gjithashtu, propozimi i kandidatit për President në Shqipëri bëhet përmes Kuvendit, ku një grup prej jo më pak se 20 deputetësh propozojnë një emër për këtë pozitë.
Bazuar në metodologjinë e punës, hibrid.info e ka vlerësuar këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.