Portale të dyshimta me përmbajtje në gjuhën shqipe, kanë publikuar një artikull me pretendimin se një grua 53 vjeçare që jeton në Gjermani, është në kërkim të një mashkulli shqiptar.
Pas verifikimit të fakteve të kryer nga hibrid.info, është vërtetuar se fotografia e përdorur në këtë artikull i përket aktores nga Holliwood, Salma Hayek.
Këto portale kanë përdorur fotografinë e kësaj aktoreje, me pretendimin ta paraqesin si një grua shqiptare.
Vegëzat e artikullit të publikuar në portalet e dyshimta “news27link.com”, “lajmet.news336media.com” dhe “infospostmedia.com”:
Ky artikull është shpërndarë edhe në Facebook më 26 dhjetor nga faqet “Gazeta Globale” dhe “Diaspora Sot”. Ndërsa më 6 maj është gjetur i postuar në faqen “33shi.com”.
Pas hulumtimit të kryer përmes programit të automatizuar online “InVID” për kontroll faktesh, hibrid.info ka gjetur fotografinë e aktores Salma Hayek, e cila është shkrepur nga “Reuters” në maj të vitit 2018 gjatë një gala mbrëmje. (shih këtu)
Për ta qartësuar edhe më shumë se gruaja e paraqitur në këtë fotografi është aktorja Hayek, hibrid.info ka gjetur llogarinë e saj personale në “Instagram” (këtu).
Analiza:
Portale të dyshimta kanë publikuar artikull të sajuar se gjoja një grua 53 vjeçare në Gjermani, është në kërkim të një mashkulli shqiptar.
Në këtë artikull, kanë vendosur fotografinë e aktores së Holliwood-it, Salma Hayek.
Bazuar në metodologjinë e punës, hibrid.info e vlerëson këtë artikull si “Mashtrim”.