Portale të dyshimta me përmbajtje në gjuhën shqipe kanë publikuar një artikull me titull “Ja pamjet se cfare zbuluan shkenctaren ne cernobil, do te mbeteni pafjal pasi ti shikoni..(VIDEO)”.
Në përmbajtje të këtij artikulli gjendet një përmbajtje gjysmake në lidhje me disa pajisje radioaktive të gjetura në qytetin e Çernobilit, pas aksidentit bërthamor që ndodhi më 26 prill 1986 në reaktorin bërthamor Nr.4 në Centralin Bërthamor të Çernobilit. (shih këtu)
Përveç këtij informacioni, në përmbajtje gjendet një fotografi e marrë nga një kanal në Youtube, e që në këtë imazh paraqitet një gjallesë e madhe në formë oktapodi.
Pas hulumtimit të kryer përmes makinave online të kërkimit, është vërtetuar se imazhi që paraqet një oktapod gjigand, nuk është real, por i punuar nga një artist i quajtur Louis Le Roy.
Vegëza e artikullit të publikuar në portalet e dyshimta “kingpress24hd.info” dhe “sitenewspaper.com”:
Artikulli i publikuar nga këto portale të dyshimta është shpërndarë edhe në median sociale Facebook nga faqet “Lajme Fresh24” dhe “Melodi shpirti”. (shih këtu dhe këtu)
Pas hulumtimit në platformën online “Youtube”, hibrid.info ka arritur të gjejë video-materialin që flet për radioaktivitetin në Çernobil, e që gjithashtu në fillim të videos paraqitet imazhi i gjallesës që ngjason me një oktapod. (shih fotografinë më poshtë)
Në këtë video-material të gjatë mbi 10 minuta të publikuar nga kanali “Fakte interesante Shqip”, në asnjë rast nuk paraqitet një imazh i tillë që shpjegon në lidhje me këtë gjallesë, që mundohet të paraqitet si e gjetur në Çernobil. (shih këtu)
Pas hulumtimit të kryer përmes “InVID”, hibrid.info ka vërtetuar se imazhi i paraqitur, është veçse punim i një artisti të quajtur Louis Le Roy, i publikuar në ueb-faqen “artstation.com”. (shih këtu)
Analiza:
Pas verifikimit të fakteve, hibrid.info ka vërtetuar se imazhi i paraqitur nga portalet e dyshimta dhe nga kanali “Fakte interesante Shqip”, është një punim i një artisti.
Kanali i mësipërm dhe portalet e dyshimta, janë munduar që këtë punim artistik ta paraqesin si diçka të pazakontë, të gjetur në qytetin e Çernobilit pas aksidentit bërthamor që ndodhi më 26 prill 1986.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
