Portale të dyshimta më përmbajtje në gjuhën shqipe kanë publikuar shpallje të rreme për shitje të banesave në të cilave u kanë vënë tituj si “URGJENT: Shitet Banesa Tre Dhomëshe E Mobiluar Për 14,500 Euro Në Qendër” dhe “Shitet Banesa Tre Dhomëshe E Mobiluar Për 33,000 Mijë Euro Në Qendër Të Qytetit(FOTO)”.
Nga hulumtimi i kryer përmes aplikacionit për kontroll të automatizuar “InVID”, hibrid.info ka arritur të gjejë shpalljen autentike që është përdorur nga këto portale të dyshimta, e publikuar në vitin 2016 nga “Vatra e Kosovës”, por me fotografi të një banese tjetër. (shih këtu)
Vegëzat e artikullit të publikuar në portalet e dyshimta “Banglacontent24.com” dhe “Gazetadirekte.com”:
Këto shpallje mashtruese janë shpërndarë edhe në Facebook nga faqet “Gazeta Aktive” dhe “Gazeta Direkte”. (shih këtu dhe këtu)
Fotografia e përdorur në shpalljen e publikuar nga portali i dyshimtë “Gazetadirekte.com” nuk i përket përmbajtjes së shpalljes autentike të vitit 2016. Hibrid.info ka arritur ta gjejë se e njëjta i përket një shpalljes për një banesë në Maqedoni, e publikuar më 15 shkurt 2018. (shih këtu)
Ndërsa fotografinë e përdorur nga portali tjetër i dyshimtë “Banglacontent24.com”, hibrid.info nuk ka arritur ta gjejë.
Kjo nuk është hera e parë që shpallje të tilla publikohen nga portale të dyshimta, pasi njëjtë ka ndodhur edhe në qershor të vitit 2021, e që gjithashtu ato janë verifikuar nga stafi i hibrid.info. (shih këtu)
Analiza:
Këto portale të dyshimta kanë përdorur një përshkrim të një shpalljeje të vjetër (2016) për shitjen e një banese, të cilin e kanë publikuar me pretendimin ta paraqesin si aktuale.
Portalet e dyshimta të lartcekura kanë mashtruar në titull se gjoja kjo banesë është urgjentisht në shitje. Në njërën shpallje pretendohet rrejshëm se banesa shitet për 14 mijë e 500 euro, ndërsa në tjetrën thuhet se ajo ka çmim prej 33 mijë euro.
Pas verifikimit të fakteve, bazuar në metodologjinë e punës, hibrid.info e ka vlerësuar këtë artikull si “mashtrim”.
