Portali nga Bujanoci “Bujanocke.co.rs” ka publikuar një artikull me pretendimin se qytetarë nga Kosova, të nacionaliteti serb dhe shqiptar, po udhëtojnë në Bujanoc për t’u vaksinuar kundër virusit Korona.
Mirëpo, menjëhere pas këtij lajmi, ka reaguar kryetari i Bujanocit, Nagip Arifi, i cili përmes një prononcimi për “Gazetaexpress.com” e ka demantuar pretendimin e këtij mediumi.
Ndërkohë, në artikullin e “Bujanocke.co.rs” thuhet se “qytetarë të Kosovës, në mesin e të cilëve edhe disa shqiptrarë, vaksionohen kundër virusit Korona në Shtëpinë e Shëndetit në Bujanoc”.
Pjesë nga artikulli i “Bujanocke.co.rs” i përkthyer në shqip:
Banorë të Kosovës dhe Metohisë, përfshirë shqiptarët, po vaksinohen kundër Koronës në Qendrën Shëndetësore në Bujanoc. Ata arritën në Bujanoc të Enjten me dhjetëra autobusë nga Ranilluga, Gjilani, Kamenica dhe zonat përreth. Shqiptarët nga Gjilani, me të cilët bisedoi Bujanocke.co.rs, thonë se ata erdhën në Bujanoc për t’u vaksinuar sepse nuk ka vaksina në Kosovë, dhe ata e shfrytëzuan rastin që iu ofrua.
Vegëza e artikullit të “Bujanocke.co.rs” në gjuhën serbe:
Pretendimi i këtij portali se qytetarë të nacionaliteti shqiptarë nga Kosova po vaksinohen në Bujanoc, bazohet në një gjoja bisedë që ky medium e ka bërë me disa prej tyre, pa u bazuar në të dhëna zyrtare. Në artikull kanë marr prononcime të udhëheqësve të Shtëpisë së Shëndetit në Bujanoc, por pa arritur që ta argumentojnë këtë pretendim të cilin e kanë shprehur në pjesën hyrëse të artikullit.
Ky pretendim është demantuar më pas nga kryetari i komunës së Bujanocit, Nagip Arifi. Ai në prononcimin për Gazetën Express (gazetaexpress.com) ka thënë se lajmi me pretendimin se shqiptarë nga Kosova po vaksinohen në Bujanoc, nuk është konfirmuar nga koordinatorja për organizimin e vaksinimit të qytetarëve të komunës së Bujanocit kundër COVID-19:
Deklarata e Nagip Arifit:
“Nga informatat që i kam nga koordinatorja për organizimin e vaksinimit të qytetarëve të komunës së Bujanocit kundër COVID-19, Dr. Afërdita Mustafa, e cila njëherit është edhe mjeke në Shtëpinë e Shëndetit në Bujanoc dhe e emëruar si koordinatore nga Shtabi për situata të jashtëzakonshme të komunës sonë, asnjë shqiptar nga Republika e Kosovës nuk ka marrë vaksinë. Por të gjithë kanë qenë serbë të pjesë së Anamoravës, e të cilët janë vaksinuar në Bujanoc në një hapësirë të Shtëpisë së Shëndetit me urdhër të Ministrisë së Shëndetësisë së Republikës së Serbisë”
Analiza:
Pretendimi i “Bujanocke.co.rs” për vaksinimin e shqiptarëve të Kosovës në Bujanoc me vaksinat anti-covid, rezulton të jetë i pavërtetë. Ky medium nuk arrinë ta argumentojë këtë pretendim. Përveç aludimit se kanë biseduar me një qytetarë shqiptar nga komuna e Gjilanit, të cilit nuk i paraqitet identiteti as përmes emrit dhe as përmes ndonjë prove tjetër. Duke ia shtuar këtë edhe demantin e të parit të Bujanocit si dhe të zyrtares përgjegjëse për procesin e vaksinimit në këtë komunë , ky lajm i “Bujanocke.co.rs” rezulton të jetë i rremë dhe përmbajtje e pa verifikuar.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
hibrid.info
