Mediumi serb “B92” ka publikuar një artikull me titull “Skandal në Prishtinë dhe një mesazh për malazezët: Ju e keni radhën”, duke pretenduar ta përshkruajnë një thirrje “parullë” që gjoja e kanë mbajtur tifozët kosovarë në ndeshjen mes klubit të futbollit “Llapi” dhe atij nga Podgorica “Buduqnost”.
Këto dy klube zhvilluan dje (14 korrik) një ndeshje kualifikuese për garën ndërkombëtare “Conference League”.
Në artikullin e këtij mediumi serb pretendohet se tifozët kosovarë kanë mbajtur këtë llojë thirrje, për të nxitur provokime (shih vegëzen e artikullit këtu).
Pjesë nga artikulli i “B92”, të përkthyera në shqip:
T: Skandal në Prishtinë dhe një mesazh për malazezët: Ju e keni radhën
Një provokim ka ndodhur në ndeshjen mes Llapit dhe Buduqnostit në Prishtinë.
Në tribuna ishte shfaqur një hartë e Malit të Zi, nga e cila ishte “veçuar” një pjesë me mesazhin: “Ju e keni radhën”.
Përveç këtij pretendimi të bërë në titull dhe përmbajtje të artikullit, autori shihet se nuk ka dhënë fakte që e plotësojnë pretendimin. Në artikull nuk paraqitet asnjë imazh fotografik dhe as në format të videos që pasqyron një pankartë të tillë.
Në fotografinë ilustruese të artikullit paraqiten imazhe të disa tifozëve, që sipas legjendës, është shkëputur nga ndeshja Shqipëri – Serbi në vitin 2016.
Analiza:
Mediumi serb “B92” ka bërë një pretendim të pa faktuar.
Nga kontrolli i fakteve të bërë nga hibrid.info, është parë se në artikullin e këtij medium nuk është paraqitur asnjë dëshmi vizuale që vërteton pretendimin se tifozët kosovarë kanë mbajtur pankartë me thirrjen “Ju e keni radhën”.
Kjo mund të jetë e vërtetë por, përderisa ajo nuk vërtetohet në artikull, hibrid.info e vlerëson këtë artikull si “Përmbajte e Pa Verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.