Portali i dyshimtë “gjithckafresh.info” ka publikuar një artikull me titull “Hoti ofendon rëndë Vjosa Osmanin: S’është për politikë Vjosa, e vogël është ajo…”.
Ky artikull përmban titull të rremë dhe tendencioz, i cili nuk i përgjigjet aspak përmbajtjes. Pretendimi se kryeministri në detyrë, Avdullah Hoti, ka ofenduar Vjosa Osmanin duke e quajtur se e vogël dhe se nuk është për politikë, del të jetë i pavërtetë.
Me datën 30 dhjetor të vitit të kaluar, Hoti gjatë intervistë në emisionin Rubikon në Klan Kosova, kishte potencuar se ish-bashkëpartiakja e tij, Vjosa Osmani, nuk ka të ardhme në politike, meqenëse sipas tij, ajo është larguar nga LDK-ja.
Pjesë e tekstit nga artikulli i publikuar në “gjithckafresh.info”:
Hoti ofendon rëndë Vjosa Osmanin: S’është për politikë Vjosa, e vogël është ajo…
Kryeministri në detyrë i Qeverisë së Kosovës, Avdullah Hoti, ka deklaruar se ish bashkëpartiakja e tij, Vjosa Osmani, nuk ka të ardhme në politike pasi ka dalë nga LDK-ja. Në Rubikon me Adriatik Kelmendin ai u shpreh se Osmani është formuar brenda LDK-së dhe nëse merr veprime për ta dëmtuar shtëpinë e saj politike, sipas tij që ajo tani po e bën, tregon që asnjëherë nuk ka qenë e sinqertë në LDK.
“Në zgjedhjet e kaluara, Vjosa Osmani ka qenë prijëse e listës dhe është e natyrshme që ka qenë personi më i votuar, por tani ajo ka vendosur ta ndjekë rrugën e vet politike dhe ky është vendim i saj”.
“Nga aspekti sjelljes politike nuk besoj që është vendim i duhur, por është vendim i saj. Ajo i ka ndarë rrugët me LDK-në, e cila neve na ka dhënë përgjegjësi. Është privilegj i madh të jesh prijës i listës. Kur e fiton këtë besim duhet ta vlerësosh. Fakti që i ka ndarë rrugët me LDK-në do të thotë se nuk e ka vlerësuar. Ajo është shkarkuar nga partia se nuk i respektoi vendimet e LDK-së”.
Vegëza e artikullit të publikuar në “gjithckafresh.info”:
Hoti gjatë kësaj interviste kishte thënë:
“Normalisht që LDK dëmtohet nga largimi i saj, kjo është e kuptueshme, por jam i bindur se të ardhme në politikë nuk ka. Nuk ka logjikë të ketë të ardhme jashtë LDK-së, se kjo parti e ka formuar këtu ku është. Mbështetjen që e ka pasur në vitin 2019 ia ka dhënë LDK-ja”.
Më poshtë mund të lexoni artikullin origjinal me deklaratën e Hotit për Vjosa Osmanin:
https://klankosova.tv/hoti-per-osmanin-jam-i-bindur-se-te-ardhme-ne-politike-nuk-ka/
Video nga emisioni Rubikon, ku i ftuar ishte Avdullah Hoti:
Analiza:
Portali i dyshimtë “gjithckafresh.info” ka marrë lajmin origjinal nga KlanKosova.tv, të cilit më pas i ka vënë titull të rremë në mënyrë që të tërheqë sa më shumë lexues. Artikulli me lajm të pretenduar rrejshëm, e ka shpërndarë në faqen “Gazeta Aktive” në Facebook e cila numëron mbi 80 mijë ndjekës, ndërsa me këtë lajm ka arritur të marrë 10 pëlqime dhe afër 20 komente. Pas verifikimit të fakteve nga hibrid.info, del që ky shkrim kategorizohet si “dezinformatë” dhe “clickbait”.
Arsyetimi:
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
