Artikull nga hibrid.info
Lëvizja moderne kundër vaksinimit daton që nga punimi i pasaktë i vitit 1998 i realizuar nga Andrew Wakefield, në të cilin pretendohet të trajtohet ndërlidhja midis vaksinës së fruthit, shytave dhe rubeolës (MMR) dhe zhvillimit të autizmit tek fëmijët. Biologu i njohur amerikan, Jonathan M. Berman e quan veprën e ish-mjekut britanik një “mashtrim të plotë shkencor”, duke vënë në pikëpyetje motivimet e Wakefield dhe renditjen e studimeve.
Në librin e tij të publikuar “Anti-vaxxers: Si të sfidoni një lëvizje dezinformuese”, Berman ka bërë përpjekje që të hedh dritë mbi këto lëvizje konspiracioniste, që shtyjnë përpara idenë e kundërshtimit të vaksinave.
Lëvizje kundër vaksinave të njohura si “anti-vax” kanë ardhur në shprehje edhe më shumë në këtë periudhë, me paraqitjen e pandemisë COVID-19. Përgjatë kohës kur është duke u raportuar në media rreth hulumtimeve që po bëhen nga institute të ndryshme kredibile për zbulimin e vaksinës kundër virusit Korona, kryesisht në Evropën Perëndimore e SHBA, njëkohësisht janë rritur edhe zërat kundër kësaj. Për më shumë, përpos reagimeve kundër në rrjete sociale, në disa vende perëndimore janë organizuar edhe protesta nga aktivistë të ndryshëm.
I gjithë ky kundërshtim, siç duket ka gjenezën te punimi kontravers i Wakefield, duke ngritur shumë pikëpyetje tek njerëzit rreth efekteve anësore të vaksinave. Mirëpo, përgjatë viteve, kjo hipotezë është plotësuar edhe me shumë teori konspirative, të pabazuara në fakte. Teori të tilla kanë shpërndarë konspiracionistë nga e gjithë bota dhe kanë kulmuar në këtë vit me krijimin e shumë grupeve e faqeve në rrjete sociale nga disa lëvizjeve të dyshimta.
Kryekonspiracionisti botëror, anglezi David Icke, vazhdon të mbetët figura kryesore që nxitë këto dilema. Ai në një prononcim të tij për media britanike më 8 prill 2020, bëri një pretendim të pambështetur në fakte dhe të pa-argumentueshëm se gjoja “Izraeli po përdorte krizën e krijuar nga pandemia ‘për të provuar teknologjinë e tyre’ dhe sugjeroi që çdo përpjekje për të kërkuar që njerëzit të vaksinohen kundër COVID-19 ishte ‘fashizëm’.
Idetë e tij të pabaza kanë inspiruar edhe shumë konspiracionistë të vendeve tjera. Në linjë me të është edhe konspiracionisti shqiptar, Alfred Cako. Përveç që përkrahë idetë e Icke, Cako ka botuar edhe një sërë libra të këtij konspiracionisti britanik të njohur me zhanrin “nonfiction”.
Në periudhën mes muajve mars-maj, gjatë izolimit si masë kundër përhapjes së virusit Korona në Shqipëri e Kosovë, dhe në kohën kur paralajmëroheshin hulumtimet dhe studimet rreth zbulimit të vaksinës, Cako në shumë studio televizive në Tiranë, por që kanë shikueshmëri të konsiderueshme edhe nga audienca në Kosovë, kishte transmetuar disa teori konspirative duke pretenduar të shfaqë kundërshtitë e tij për këtë vaksinë.
Në kuadër të emisionit “360gradë”, Cako kishte përmendur disa teori kundër vaksinës, duke pretenduar se vaksinimi do të zvogëlojë numrin e popullsisë në botë.
“Vaksina do të ulë numrin e popullsisë, sipas algoritmit. Algoritmet do të jenë të ndryshime, sipas moshës dhe racës”.
Komenti i Cakos në emisionin 360gradë:
Këtë ide të tijën, por dhe shumtë të tjera, Cako i thotë pa dhënë asnjë argument. Ai mendimet e njëjta i shpërndan edhe përmes profilit të tij në Facebook. Mirëpo të njëjtit i është bllokuar disa herë profili. Këtë e ka pohuar vet Cako, duke vazhduar me idetë e tij konspiracioniste për arsyen e bllokimit të faqes.
Teoritë konspirative të Cakos nxisin debat tek mjekët dhe studiuesit në Shqipëri. Cako është kritikuar se shpërndanë teori konspirative duke mos i bazuar ato.
Rrjetet sociale, së fundmi kanë ndërmarrë një fushatë për mbyllje të profileve, faqeve dhe grupeve nga e gjithë bota të cilat shpërndajnë teori të ngjashme. Në mesin e teorive konspirative rreth vaksinës është ajo që pretendon se injektimi i vaksinës ka për qëllim të fus disa mikro-çipa në organizëm nga kompania e Bill Gates (Microsoft), duke bërë ndryshime në ADN-në tonë, apo pretendimi se gjithçka rreth pandemisë është një sajim.
Për këtë arsye, rrjetet sociale si Facebook apo Twitter, kanë arritur t’i mbyllin disa llogari të tilla që shpërndajnë lajme të rreme, në mënyrë që mos t’i dezinformojë lexuesit.
Duke e parë rrezikun që vije nga këto teori, organet britanike kanë ndërmarrë hapa, për të sensibilizuar opinionin, përmes disa njoftimeve.
Në një video-kronikë, dedikuar kësaj teme, BBC ka prezantuar disa fakte rreth tendencës për të manipuluar për vaksinën kundër COVID-19.
Deputeti i Parlamentit të Britanisë së Madhe, Ogmore Chris Elmore, udhëheqës i rrjeteve sociale të të gjitha partive parlamentare, këto dezinformata i ka quajtur si një “bombë me sahat”. Ai ka alarmuar institucionet britanike që të ndërmarrin masa që trajtojnë dezinformatat kundër-vaks.
Studiuesit e cilësojnë këtë nismë globale kundër vaksinës apo vaksinave si një rrezik për njerëzimin, dhe bëjnë thirrje nga autoritetet që ndërmarrin veprime në parandalimin e tyre.
Për këtë arsye edhe libri i biologut Berman “Anti-vaxxers”, duhet të shërbejë si një thirrje për secilin prej nesh për të bindur të tjerët të marrin një vaksinë, nëse vërtetohet e sigurt dhe efektive.
(hibrid.info)
