Portali “kosova-sot.info” ka publikuar një artikull me titull “Ukë Rugova pjesë e listës zgjedhore, për ta shpëtuar LDK-në nga humbja fatale”.
Titulli i këtij artikulli nuk përputhet me përmbajtjen, pasi në tekstin e këtij lajmi thuhet se “burime të sigurta brenda LDK-së tregojnë së shumë shpejtë do të ketë takim mes përfaqësuesve të familjes së ish-presidentit Ibrahim Rugova dhe zyrtarëve të kësaj partie, që do të rezultojë me bashkëpunim për zgjedhjet e ardhshme”.
Pra, siç mund të vërtetohet nga përmbajtja e këtij artikulli, ende nuk ka asgjë zyrtare rreth bashkëpunimit të LDK-së me Ukë Rugovën apo të ndonjë anëtari tjetër të familjes së ish-presidentit Rugova, siç pretendohet në titullin e artikullit të publikuar nga “kosova-sot.info”.
Teksti i artikullit të publikuar në “kosova-sot.info”:
Ukë Rugova pjesë e listës zgjedhore, për ta shpëtuar LDK-në nga humbja fatale
Burime të sigurta mbrenda LDK-së tregojnë së shumë shpejt do të takohen më Familjen Rugova dhë ti ftojnë që të jene pjesë e LDK-së në zgjedhjet e ardhshmë që pritet të mbahen në fillim të shkurt-it.
Edhe në zgjedhjet e vitit 2019 LDK i kishte bërë ftesë Familjes Rugova por ata ishin deklaruar së mbështesin LDK-në por as një antarë i tyre nuk do të kandidojnë për deputet.
Në këto zgjedhje pritet që Ukë Rugova ti rikthehet politikës, pas shpalljës së pafajshëm në një proces të montuar më motive politike.
Vegëza e artikullit të publikuar në “kosova-sot.info”:
Analiza:
Titulli i këtij artikulli nuk përputhet me përmbajtjen, duke qenë se ende nuk është publikuar ndonjë marrëveshje zyrtare për pjesëmarrje të Ukë Rugovës në listën e LDK-së në zgjedhjet e ardhshme nacionale. Gjithashtu, në tekstin e këtij shkrimi thuhet se djali i ish-presidentit Rugova pritet që të rikthehet në politikë, por kjo gjë ende nuk është e sigurt, siç pretendohet në titullin e artikullit të “kosova-sot.info”. Pas verifikimit të fakteve nga hibrid.info, del që ky artikull kategorizohet si “dezinformatë” dhe “clickbait”.
Arsyetimi:
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
