Shkroi: Fatbardh Dema
Përdoruesit e Facebookut kanë pranuar një mesazh paralajmërues në seksionin e mesazheve, ku pretendohet se faqja e tyre do të mbyllet përgjithmonë për shkak të një gabimi në menaxhim.
Mesazhi përmban një vegëz (link), e cila kërkohet të klikohet nëse përdoruesi beson se bëhet fjalë për një gabim nga ana e Facebookut. Ai është shkruar në gjuhën shqipe, por dërguesi mban një emër të huaj, “Walter Silva”.
Çka gjeti hibrid.info?
Pas verifikimit të fakteve të kryer nga hibrid.info u vërtetua se ky mesazh nuk vjen nga Facebook (META) dhe se i njëjti është mashtrim.
Hibrid.info ka klikuar në vegëzën e ofruar në mesazh, e cila drejtonte drejt një faqeje që imiton Facebookun dhe kërkon të dhënat e kyçjes.
Megjithatë, platforma e sigurisë kibernetike “Mozo”, e specializuar në mbrojtjen kundër vjedhjes së identitetit, paralajmëron se kjo faqe është e dyshimtë dhe u bën thirrje përdoruesve për kujdes.
“Kujdes, është detektuar faqe e dyshimtë! Mbroni veten nga kërcënimet online, duke e aktivizuar funksionin e bllokimit të faqes së dyshimtë në internet”. (shih fotografinë më poshtë)
Hibrid.info ka shfrytëzuar “Scam-detector.com”, vegël e vlerësimit të besimit të identiteteve digjitale (adresave elektronike dhe uebfaqeve) dhe ka gjetur se domaini në mesazh është i dyshimtë dhe është i lidhur me faqe tjera të dyshimta. (shih këtu)
Analiza:
Një mesazh i dërguar në Facebook, që pretendon se përdoruesi ka bërë gabim në menaxhimin e faqes dhe se si pasojë llogaria e tij/saj do të mbyllet, është një mashtrim.
Dërguesi dhe vegëza e përfshirë në mesazh nuk janë të besueshme. Hibrid.info ka përdorur platforma të verifikimit të ueb-faqeve për të analizuar këtë vegëz dhe ka zbuluar se ajo është e dyshimtë dhe e lidhur me faqe të tjera mashtruese.
Bazuar në metodologjinë e punës, hibrid.info e vlerëson këtë mesazh si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.
