Portali i dyshimtë “GazetaNewborn.info” ka publikuar dje (12 dhjetor) një artikull me titull “Ekskluzive: Pritet brenda 24 orëve lirimi i policit serb të arrestuar dhe heqja e barrikadave”.
Ky portal ka pretenduar se Polici serb i arrestuar ditë më parë, “pritet të lirohet brenda 24 orëve të ardhshme dhe të bëhet heqja e barrikadave në Veri”.
Sipas autorit të këtij artikulli pretendohet se ish-pjesëtari i Policisë së Kosovës nga komuniteti serb do të lirohet shkaku i kaosit që mbizotëron në gjykatat në veri të Mitrovicës.
Ish-zyrtari policor Dejan Pantiq nga komuniteti serb ishte arrestuar më 10 dhjetor nga Policia e Kosovës nën dyshimet për sulm me mjete shpërthyese, në zyret e Komisionit Komunal të Zgjedhjeve (KKZ) në veri të vendit me ç’rast ishin sulmuar zyrtarët e KQZ-së dhe zyrtarët policorë. (shih këtu)
Megjithatë, ky pretendim i bërë nga ky portal i dyshimtë është i pasaktë, pasi ish-zyrtarit policor i është caktuar një muaj paraburgim.
Vegëza e artikullit të publikuar në portalin e dyshimtë “GazetaNewborn.info”:
Ky artikull është shpërndarë edhe në rrjetin social Facebook nga faqja “Gazeta Newborn”, e cila në këtë postim ka arritur të grumbullojë qindra komente e reagime nga lexuesit. (shih këtu)
Zëdhënësja e Gjykatës Themelore në Prishtinë, Mirlinda Gashi, i tha “Radios Evropa e Lirë” se ish-policit serb, Dejan Pantiq, i është caktuar një muaj paraburgim, i cili dyshohet për “kryerjen e veprës penale terroriste”. (shih këtu)
Prokuroria Themelore ka bërë kërkesë në Gjykatën Themelore të Prishtinës që ta dërgojë në paraburgim ish-policin e Policisë së Kosovës, Dejan Pantiq, shkruan “KosovaPress.com”. (shih këtu)
Analiza:
Portali i dyshimtë “GazetaNewborn.info” ka pretenduar rrejshëm se ish-pjesëtari i Policisë së Kosovës, Dejan Pantiq, do të lirohet brenda 24 orëve, si dhe do të bëhet heqja e barrikadave në veri të Kosovës.
Nga Gjykata Themelore në Prishtinë është bërë e ditur se Pantiqit i është caktuar një muaj paraburgim, pasi i njëjti dyshohet për “kryerjen e veprës penale terroriste”.
Bazuar në metodologjinë e punës, hibrid.info e vlerëson artikullin e publikuar nga “GazetaNewborn.info” si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
