Shkroi: Etrit Rexhepi
Publikohet një përmbajtje me mbishkrimin se paraqet një sondazh për mbështetjen qytetare për kandidatët për kryetar komune në Mitrovicën e Jugut.
Ky postim është publikuar të hënën (29 shtator) nga një llogari në Facebook me emrin “Qoka-al”.
Pse trajtohet sondazhi i pretenduar?
Hibrid.info ka vërejtur se nuk është e qartë se cili institucion i specializuar për anketime e ka realizuar sondazhin, ndërsa këtij të fundit i mungojnë të dhënat mbi metodologjinë dhe periudhën e zhvillimit të matjeve.
Deri në momentin e trajtimit publikimi ka marrë afër 200 pëlqime afër 100 komente, ndërsa llogaria që e ka publikuar ka më shumë 30 mijë ndjekës (shih këtu).
Sipas asaj që shkruhet në postim, kandidati i Lëvizjes Vetëvendosje (LVV) Faton Peci ka marrë 62% të mbështetjes nga anketimi, Arian Tahiri nga Partia Demokratike e Kosovës (PDK) ka 28 %, ndërsa kandidatët e tjerë kanë 10%.
Në mbishkrimin e publikimit vërehen gabime drejtshkrimore, siç është përdorimi i fjalës “sontazh” në vend të “sondazh”.
Përveç Faton Pecit (LVV) dhe Arian Tahirit (PDK) në zgjedhjet lokale për kryetar në Komunën e Mitrovicës së Jugut garojnë Qazim Nimani nga Aleanca për Ardhmërinë e Kosovës (AAK) dhe Gëzim Plakolli nga Lidhja Demokratike e Kosovës (LDK).
Rreth sondazheve
Sondazhi është hulumtim paraprak për të njohur një gjendje, mendimet a qëndrimet për diçka të caktuar. Në këtë metodë statistikore nxirren rezultate bazuar në studimin e një pjese të popullatës, që quhet mostër.
Bazuar në artikullin e institutit Pew Research (institut kërkimor për sondazhe dhe studime të bazuara në fakte), sqarohet se çfarë informata duhet të kërkohen për mënyrën se si është kryer një sondazh.
Kush e kreu sondazhin dhe kush e sponsorizoi atë?
Kush u intervistua?
Si u zhvillua sondazhi?
Si u përzgjodhën njerëzit për sondazhin?
Kur u krye sondazhi?
Sa persona u intervistuan?
A u peshua sondazhi? Nëse po, si?
A duken pyetjet e sondazhit sikur janë neutrale dhe të drejta?
Analiza:
Publikimi që pretendon se paraqet një sondazh në zgjedhjet për kryetar komune në Mitrovicën e Jugut nuk është i besueshëm.
Kjo përmbajtje është publikuar nga një llogari në Facebook dhe jo nga një media e besueshme, nuk e përmend kush e ka kryer sondazhin, i mungojnë informacionet mbi metodologjinë dhe periudhën e matjes, si dhe publikimi përmban gabime drejtshkrimore.
Andaj, bazuar në metodologjinë e punës, hibrid.info e vlerëson përmbajtjen si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
