Portalet “GazetaExpress.com” dhe “GazetaDemos.com” kanë publikuar një artikull me titull “Sa para u mblodhën në Fondin e Sigurisë? Zëvendësministri i Mbrojtjes Syla jep detaje”.
Pas verifikimit të fakteve të kryer nga hibrid.info, është vërtetuar se titulli i këtij artikulli nuk korrespondon me përmbajtjen, pasi zëvendësministri i Mbrojtjes, Shemsi Syla, nuk ka dhënë detaje për shumën e mjeteve financiare të grumbulluara në Fondin e Sigurisë.
Syla në një intervistë dhënë për Kosovapress.com, nuk tregon ndonjë shifër të përafërt për grumbullimet në këtë fond, por shton se investimi i tyre do të analizohet nga ekspertë ushtarakë.
“Nuk kemi shifër të përafërt, nuk kemi shifër të saktë, ndërkohë jam i bindur që Qeveria shumë shpejtë do të dalë me një të dhënë të saktë”, tha ndër të tjerash Syla për Kosovapress.com.
Vegëzat e artikullit të publikuar në portalet “GazetaExpress.com” dhe “GazetaDemos.com”:
Intervistën e plotë të zëvendësministrit të Mbrojtjes, Shemsi Syla dhënë për “Kosovapress.com” mund ta gjeni këtu dhe këtu.
Analiza:
Portalet “GazetaExpress.com” dhe “GazetaDemos.com” këtij artikulli i kanë vënë titull jo adekuat, duke lënë të kuptohet se Syla ka dhënë detaje për shumën e mbledhur në Fondin e Sigurisë.
Mirëpo, pas verifikimit të fakteve, është vërtetuar se zëvendësministri i Mbrojtjes nuk ka dhënë shifër të saktë lidhur me këtë Fond.
Pas analizës së kontrollit të fakteve bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.