Portali “arbresh.info” ka publikuar një artikull me titull “Koronavirusi në Kosovë: 6,894 raste aktive; 45,002 të shëruar dhe 1,368 viktima”.
Pas verifikimit të kryer nga hibrid.info, vërehet qartë se titulli i këtij artikulli nuk përputhet me përmbajtjen. Përderisa në titull jepen disa shifra tjera të rasteve aktive, të shëruarve dhe viktimave nga virusi Korona, në përmbajtje ato paraqiten ndryshe. Në përmbajtje të artikullit, në fakt janë shifrat reale të bazuar në raportin e datës 17 janar të publikuar nga IKSHPK që gjendet brenda tekstit.
Pjesë nga teksti i artikullit të publikuar nga “arbresh.info”:
Numri i rasteve aktive me koronavirus në Kosovë ka shkuar në 6,894 nga 53,264 raste të konfirmuara që nga fillimi i pandemisë.
45,002 pacientë kanë fituar betejën me koronavirusin, ndërsa 1,368 viktima janë shënuar që nga fillimi.
Të hospitalizuar janë më shumë se 700 pacientë, mbi 20 nga ta në ventilator.
Vetëm gjatë 24 orëve të fundit janë shënuar 353 raste të reja, derisa janë shëruar 297 persona.
Ky është njoftimi i fundit nga IKSHPK:
‘’ 279 TË SHËRUAR DHE 353 RASTE ME COVID-19!
Gjatë 24 orëve të fundit, në Laboratorin e Mikrobiologjisë Molekulare në IKShPK dhe laboratoret private me metodën RT-PCR, janë testuar gjithsej 1.642 mostra të marra nga ShSKUK dhe gjurmimi i kontakteve të rasteve në terren, prej të cilëve rezultojnë 353 raste pozitive.
Brenda 24 orëve janë raportuar 5 raste të vdekjes me SARS CoV-2 pozitiv. Rastet e vdekjes janë nga komunat: Dragash 1 rast (69 vjeç), Ferizaj 1 rast (83 vjeç), Mitrovicë 1 rast (76 vjeç), Pejë 1 rast (78 vjeç), Rahovec 1 rast (77 vjeç).
Numri total i rasteve pozitive është 55.851 raste nga 208.583 persona të dyshimtë në virusin SARS-CoV-2 dhe 1.410 raste të vdekjes.
Gjatë 24 orëve të fundit, janë shëruar 279 pacientë derisa numri i përgjithshëm i të shëruarve deri më sot është gjithsej 49.269 raste, kurse numri i rasteve aktive është 5.172.
Vegëza e artikullit të publikuar nga “arbresh.info”:
Më poshtë mund të gjeni raportin e datës 17 janar nga IKSHPK lidhur me shifrat aktuale të rasteve të reja pozitive, të shëruarve dhe rasteve të vdekjes si pasojë e COVID-19:
https://www.facebook.com/IKSHPK/posts/3417885421672771
Analiza:
Pas analizës së kontrollit të fakteve të kryer nga hibrid.info, del se titulli i artikullit në Arbresh.info është i shkruar gabim, por pa qëllimin e qartë të dezinformimit të publikut. Megjithatë, fakti që titulli i këtij artikulli flet për shifra komplet ndryshe nga ato në tekst, mund të dezinformojë lexuesit e këtij portali. Ky artikull kategorizohet si “Gabim”.
Arsyetimi:
Gabim – Vlerësimin “Gabim” e marrin raportet në media në të cilat redaksia e mediave bënë një gabim duke publikuar informacion të pasaktë ose duke transmetuar lajme të pavërtetuara nga një burim tjetër, pa qëllimin e qartë të dezinformimit të publikut.
